甫出院即跳崖 珍姐派10角考牌作

珍姐（曾勵珍）係我真正伯樂，我拍佢條Line最多，亦係佢帶我入TVB！做每樣嘢都要珍姐首肯先得，佢畀好多機會我，除咗《烈火雄心2》，仲有《爭分奪秒》。我一入TVB就見藝員部，一見就見珍姐，佢就問我以前係咪唱歌？又問我係咪拍咗《絕代雙驕》？佢當時講咗一句：「簽TVB好吖！好多機會，乖呀！」冇幾耐王心慰就Call我要接《烈火2》，呢套就係我TVB第一套劇！其後珍姐開咗套《Loving You 2》，同雯女（鄧萃雯）、King Sir（鍾景輝）、吳啟華合作，一個禮拜一集，珍姐當時同我講呢套劇係考我牌，因為要同期間拍10個唔同故事，真係做到人格分裂。好彩佢尚算滿意我嘅表現！

後來本來我拍添哥（李添勝）嘅《黑夜彩虹》，拍拍吓高血壓暈咗，入咗醫院十幾日，搞到添哥要換角色，由關禮傑頂上！好奇怪出咗院第一個Job並唔係拍劇，係派咗我去澳洲做一個叫《大學狂奔》嘅台慶節目，要玩跳傘嗰啲好激嘅活動，我心諗啱啱入完醫院十幾日，你搵我跳降傘，又搵我飛沙走石跳懸崖，廿幾樓咁高，真係腳軟o架！點解搵我做呢樣嘢o架？係咪睇我死唔死得、唔死得就畀個機會我？玩完命後真係一個角色接一個，戲份愈來愈重！

王心慰助擴戲路

我亦好多謝Amy姐（王心慰），佢唔會因為我做開沈朗（《天幕下的戀人》角色），而局限我做呢類角色，佢畀我試唔同嘅嘢，對演員嘅成長好重要，到今時今日都好感激佢，令我戲路廣咗好多！你覺得自己做到，而人哋唔畀你實現都係徒然！（明日待續）