身為名模兼天王嫂的熊黛林（Lynn），近年密密開工搵銀，但依舊貫徹慳家作風。日前她出動Shopping，在街坊小檔平掃20蚊一對的絲襪，為求慳到盡，更叫朋友幫忙看車，連停車場費用亦慳埋，認真精打細算！
當日，Lynn將座駕停在銅鑼灣路邊，並獨自呆坐車中，等了十多分鐘，一名友人來到，戴上黑超、背着名牌手袋的Lynn即急急腳落車，快步走往附近一檔平價襪店，狂掃大袋款式幾乎一模一樣的絲襪。Lynn幫襯的街坊小檔價錢大眾化，加上款式多，故深受圈中人歡迎，熟客包括關之琳及汪明荃等。
高人一等的熊黛林，以閃電速度掃走大袋絲襪，路過的伯伯睇到眼定定。
