盧頌之「性」戰逃兵

「樣靚、身材正」不過是打入模界的入場券，肯搏肯露的魄力才是最重要！眼看其他同期o靚模已憑事業線漸漸上位，賺得第一桶金，舊八模成員盧頌之（DaDa）不作瓦全，寧願放棄行性感，放長線穩打穩紮行實幹路線，並有意向形象設計方面發展。

退離往昔是非圈

正當其他模靠事業線長短爭得你死我活之時，DaDa卻有勇氣退下性感火線，走鋼線做個不一樣的模特兒：「我想用另一個形象見大家，如果論性感，我實在鬥唔過其他人！」要轉型說就容易，但面對肯搏肯露的同行，憑性感賺得荷包滿貫，DaDa仍未有絲毫退縮，更甘於做一朵出污泥而不染的蓮花：「要喺娛樂圈生存真係唔簡單，因為要好爆！但我只想殺出一條平靜嘅路，唔想牽涉喺是非內。」

開拓當下新路向

身為模，雖不像始祖周秀娜般有着驕人的事業，但樂天的DaDa知足常樂，未有放棄發掘自己的興趣及滿足感：「我鍾意做Model，亦會繼續做。唔係做咗呢行，都未必有咁多機會接觸形象設計。我本身鍾意幫人襯吓衫，依家開始幫啲新入行Model影Profolio同Design形象，希望喺呢條路發展落去！」不少圈中人都會轉投商界做生意，原來DaDa也希望有機會一嘗做老闆娘的滋味：「有朋友投資開時裝店，我有落去幫手學嘢，希望第時Ready好嗰陣可以開間自己嘅舖頭！」

夢想微小的快樂

進入娛樂圈成為藝人，因要周圍行騷出活動，有「四個轆」代步當然最好，可節省不少的士錢及時間，DaDa也一樣想早日成為有車一族：「有時要拎好多衫出街，成日Call車好麻煩。買架車方便自己做嘢，又可以揸車去玩！但架車一定要勁平凡，仲要係白色嘅，因為我唔想太易畀人認出。」為何不想被認出？答案其實並不複雜，全因DaDa實事求是，認為工作還工作，鏡頭後需保留私人空間！言談間不難從她身上察覺出單純的快樂：「雖然我考咗兩次至拎到車牌，但已經好開心，因為我終於都分到左右喇！」她能為分出左右方向而笑得如此開懷，要快樂就是如此簡單！

愛情獨立與自強

自言揸車技術平平的DaDa，連男友都不敢坐她的車：「好多朋友都話唔敢坐我車！但男友同屋企人都好支持我學嘢。自己始終仲細個，想多啲增值。其實我好怕上堂聽書，個人坐唔定，所以想學非靜態嘅嘢，游水踩單車就最啱我！」問到會否與男友一齊學？她強調大家非常獨立：「我諗都唔會，就連大家嘅事業都分得好開！我諗所有嘢順其自然係最好嘅！」

後記 ：模飯不歡

別看DaDa身形纖瘦，原來食量不小，一嚷肚餓就要吃碟頭飯填肚，邊大啖吃邊做訪問，毫不介意食相曝光！好奇問她為何不吃些澱粉質較少的食物，她說：「肚餓嘛！食番碟飯都好正常啫！」相比日夜要節食的模特兒來說，DaDa的確得天獨厚，注定吃模界飯！