朱晨麗難忘2年劏房夢魘

一場旺角花園街無情火奪去多條人命，令劏房問題再度成為全城熱話，其實不少圈中人並非外界所想般富貴，部分更住過劏房，咬緊牙關過日子，現年24歲的應屆港姐冠軍朱晨麗正是一個好例子。8年前由上海隻身來港讀書的她，為慳「盤川」與女同學夾份租住100呎劏房，故她對是次慘劇感受至深，希望政府盡快解決低下層住屋問題。

朱晨麗回想16歲那年由上海來港報讀香港演藝學院的情況，一個人拖着行李箱來到香港，令她最徬徨的就是住屋問題，她說：「香港係個寸金尺土嘅地方，租樓往往動輒數千元以上，而我想租銅鑼灣區方便返學，租金真係超貴，當時我唔明點解香港租樓可以貴得咁緊要！如果幾千蚊喺內地租屋，已經租到成千呎有幾間房o架喇！」

生活逼人，朱晨麗只好咬緊牙關過日子，與一位女同學夾錢租劏房，她說：「因為租劏房平好多，我記得當年租金大約三千幾蚊，每人只係千幾蚊。（屋企人知唔知？）當時唔敢同媽咪講，驚佢擔心，所以呃佢話租咗一間幾百呎嘅屋住，等佢可以安心啲！」

冇諗結構安全問題

劏房環境當然不太舒適，朱晨麗憶述當時住的地方是「一劏四」，她與女同學住在其中一個單位。問到有否擔心結構安全問題，她說：「真係冇諗過，當時心諗雖然呢度得一百呎，但總叫有瓦遮頭，已經好心滿意足，唔通瞓鵝頸橋咩！」她續說：「記得我間『屋』一打開門就見到張床，我同個女同學孖鋪，床隔籬放一個櫃仔擺衫，但因為冇空間擺電視機，惟有向高空發展，吊高喺床尾，所以每晚睇電視都要岳高個頭，睇得好辛苦。而廁所同廚房喺同一個位置，感覺已經好差，最難頂係樓下係茶餐廳，一開窗就有油煙味攻入屋，仲試過有蟑螂爬入嚟！對我嚟講，嗰兩年算係一場噩夢，後來個女同學離開咗香港，我自己租番一個大啲嘅地方住。」

呼籲政府正視危機

兩年「噩夢」，令朱晨麗對旺角花園街大火造成劏房單位居民死傷感受極深：「我諗番起自己住個單位樓下都係茶餐廳，萬一有火警意外會好大件事，所以劏房其實真係存在好多問題，當我睇到花園街呢宗新聞真係好唔開心，體會到佢哋生活嘅困難，住得劏房都唔係有錢人，依家仲燒埋間屋，無家可歸真係好慘！希望政府想辦法幫佢哋，聽多啲低下階層市民嘅聲音，令大家改善生活環境。」