子淇唔排除「意外」：個肚愈嚟愈大

與老公李家誠育有3名子女的「千億新抱」徐子淇，昨晚出席活動時腹部微隆，肚子愈來愈大的她揚言，照顧3個小朋友已忙得不可開交，故暫時不想再懷孕，若有「意外」則另計！

千億新抱徐子淇昨晚出席香港藝術中心舉辦的《12月當代視覺藝術展開幕典禮及晚宴》，身穿4吋高踭鞋襯紅裙的她明顯肚凸凸，問到是否要再恭喜她時，她不好意思地說：「唔係，我都唔明點解自己愈嚟愈瘦，但個肚就愈嚟愈大！」她語帶猶豫地補充：「我覺得應該唔係（懷孕），可能上星期生日食多咗。（冇做身體檢查？）冇，如果有咗，怕自己接受唔到。」

擔心二女呷醋

子淇表示以前照顧兩個小朋友還可以應付，但多了一子後變得很忙碌，更自揭瘀事：「我之前帶3個小朋友出街，發覺帶漏中間嗰個，我要習慣吓呢種生活，3個係最多！（怕唔怕中間個女呷醋？）我都驚，所以特別花多啲時間畀佢。」問到是否忙得沒時間造人，她說：「唔係，但唔可以有住，老公都唔想再要，佢覺得好嘈，總之唔要懷孕，要避孕！」雖然如此，她直言自己比老公李家誠及老爺李兆基更喜歡小朋友：「但老公係一家之主，要互相配合，意外有咗就唔同，老公好懷念以前嘅二人世界。（你之前話30歲前生5個？）未必，怕自己搞唔掂，等小朋友大個咗識照顧自己先。」

自嘲被老公呃

此外，談及生日禮物，子淇透露老公送了中國畫家的畫作給她，又指二人的緣分由「Art」開始：「當年喺英國讀書，老公想追我，藉口就話有活動要搞，叫我帶佢去美術館參觀。（佢係呃你個呃，唔係Art！）緣分由『呃』開始！」她表示老公每年都送藝術作品給她當生日禮物，但最寶貝始終是女兒的畫作。