婷婷呻拉姑：對栢芝好過對我

狄波拉與張栢芝的婆媳是非屢傳不絕，但女兒謝婷婷認為拉姑是世上最好的奶奶，對新抱恍如親生女，送袋又送鴨！雖然婷婷有點呷醋，但仍佩服媽咪的堅強及世故，全靠她才有今日的成功。

好多報道以負面角度寫媽咪（狄波拉）同栢芝嘅關係，令媽咪受到好多批評，真係好慘！我想講媽咪係「The best 奶奶 in the world 」！以前我同媽咪一齊嗰陣，無論去食乜都好，媽咪都會打畀栢芝問佢想食乜，又會拎最好嘅湯畀佢飲，仲好清楚佢唔鍾意食乜嘢例如杧果，知佢鍾意食北京填鴨，專誠託人搵畀佢食。

媽咪對栢芝真係好似親生女一樣，有時仲覺得對栢芝仲好過對我！哈哈！真o架！見佢打電話問栢芝食乜，我就會諗點解我冇得食！有次見媽咪送Hermès手袋畀栢芝，我又會諗雖然個袋咁高貴唔係好襯我，但點解我會冇？佢做到咁好、咁Generous（慷慨），我都會諗將來嘅奶奶會唔會好似媽咪咁好？

管教嚴想子女好

媽咪始終係呢行嘅人，佢會Care大家點睇佢。雖然好多人都知媽咪係好關心朋友，係任何人嘅「Guard of Angel」，但呢啲報道真係令佢傷心！人人覺得媽咪好Strong，其實佢好大壓力同成日會喊，尤其佢喺呢個家庭同埋喺呢個圈嘅位置。She is more a mum，又係呢個圈嘅Icon。

媽咪係孤兒，所以好着緊我哋，成日話哥哥係佢嘅血，我就係佢嘅肉！以前我喺加拿大，佢打嚟時如果我咳，我即刻拎開個聽筒唔想畀佢知，唔係佢就會好心痛同內疚。父母總有一個做壞人，細個負責打我哋係媽咪，打得我哋就真係抵打！媽咪話咁嚴係想我哋好，叫我哋唔好憎佢。

唔介意偏心哥哥

十二歲開始，每年都會寫卡畀媽咪話：「我大個喇！你唔使擔心。」雖然我有時會Act stupid，但我係比較成熟識諗。早排我同媽咪傾偈，媽咪攬住我話：「你終於大個女！」因為媽咪聽到好多人讚我有禮貌同成熟，但我好想媽咪知道，佢畀我嘅DNA，加埋喺佢身上真係學到好多嘢，今日嘅我係媽咪嘅成功，唔係我嘅成功。媽咪係咪偏心哥哥多啲？中國人一定錫仔多啲，我冇所謂！人性唔多唔少都會有偏心。媽咪每次見哥哥一定係暈晒，等於我見老竇時，我都會軟晒，把聲都變埋。媽咪都問我點解對佢唔係好似對老竇咁軟化，但係傾心事，一定同媽咪講得最多。

依家我同哥哥都大個，好自然想養番佢哋，例如想請食飯或買嘢畀佢哋。佢哋多數話唔使，想我哋多一個錢傍身，話我哋搵錢好辛苦。有時我覺得，如果媽咪自私啲，條路會行得更好！媽咪依家每日都食好多維他命丸，佢想身體更加健康，唔想畀包袱我同哥哥，佢從來都係為人多過為自己。（明日待續）