嘉穎3料視帝

今年視帝之爭尤其激烈，「Law霸」鄭嘉穎和「Laughing哥」謝天華一直叮噹馬頭，但始終獎得一個，在昨晚假將軍澳電視廣播城舉行的《萬千星輝頒獎典禮2011》中，鄭嘉穎從頒獎嘉賓、過氣緋聞女友鄧萃雯手上接過獎項，揮低賽前呼聲更高的天華，在5年後再嘗視帝滋味！縱然今年無綫小生、花旦鳥獸散，卻令視帝之爭更形激烈，始終林峯沒有大劇「十卜」，黎耀祥三連霸美夢在數據上變得渺茫，最終形成嘉穎和天華困獸鬥。原本一眾高層意向讓天華登頂，但嘉穎在網上投票領放太多，無綫最後一刻從善如流讓嘉穎，憑《怒火街頭》「Law霸」一角奪最佳男主角，在最後一刻跑出。

多謝四大街坊

嘉穎在台上說：「多謝Stephen投票畀我！多謝樂小姐、珍姐同Amy（王心慰）、多謝我阿媽，今次我敢講你個仔冇入錯行，多謝傳媒朋友，我要講我冇續約，冇換個獎返嚟，5年前攞呢個獎好矛盾，既開心又擔心，但依家就只有開心！」後台接受訪問時，對於再奪視帝，他眼濕濕地說：「上次上完台開心又擔心，上次好多人唔認同，希望大部分人認同先攞！」他表示還有很多年才須要續約，問到是否會加簽幾年？他說：「咁咪即係換獎？加人工就好！」然而，嘉穎亦率先奪得「tvb.com微博人氣大獎」從陳妙瑛手上接過「我最喜愛的電視男角色」，成為三料視帝！說得獎感受時，嘉穎有骨地說：「多謝深水埗四大街坊，唔係你哋冇Law霸，我相信觀眾眼睛係雪亮！」

心情忐忑

後台接受訪問時，嘉穎直言十分忐忑：「視帝真係有啲抆抆哋！」對於簽約換獎傳聞，他說：「簽約同攞獎冇關，本來應該喺台上講，不過都唔知有冇機會，其實吳鎮宇做頒獎嘉賓，都心知不妙！」他又表示不會因此獎叫價更高：「再高就冇得撈喇！」在旁的杏兒即予以安慰，並向嘉穎說：「我好認同你！」

嘉穎膺三料視帝，終令天華慘食白果，天華接受電話訪問時顯得相當平靜，他說：「了解咗乜嘢原因畀嘉，冇所謂，唔會唔開心，會返屋企同老婆食宵夜，即使《潛》攞最佳劇集都唔去慶功，因為聽朝（今早）要開零六！」全晚共頒發15個獎項，最佳劇集由《潛行狙擊》奪得。而入行55年的李香琴，則從無綫副行政主席梁乃鵬手上，接過「萬千光輝演藝人大獎」，更不忘擦公司鞋，祝無綫收視如火箭般上升。

鄭嘉穎Profile

年齡：42歲

入行經過：在已故歌唱老師戴師聰引薦下加入樂壇，後轉戰台灣，至01年返回無綫拍劇，06年憑《天幕下的戀人》首嘗視帝滋味，後主演《烈火雄心3》及《通天幹探》等，躋身一線小生行列。早前他憑《怒火街頭》在《astro我的最愛頒獎典禮》奪我的至愛男主角。