杏兒喊住封后

鄭嘉穎與胡杏兒在《萬千星輝頒獎典禮2011》稱帝封后！嘉穎憑民意扭轉局勢，揮低謝天華成為三料視帝。杏兒同樣氣勢強勁，砌低陳法拉起孖膺雙料視后，得獎時還默認黃宗澤的男友身份，發表「不去廁所論」愛的宣言！

苦等多年，胡杏兒昨晚於《萬千星輝頒獎典禮2011》終獲「雙料視后」！她亦是繼佘詩曼後第二位膺雙料視后的花旦，成為視后中的「萬凰之王」。今次杏兒演繹奸王后而擊敗陳法拉、徐子珊和鍾嘉欣等花旦奪得最佳女主角，亦成功搣甩「胡囧囧」惡名。

以黑色低胸美人魚晚裝亮相頒獎禮的杏兒，從頒獎嘉賓吳鎮宇及謝賢（四哥）手上接過視后獎座，在台上又喊又笑，吐盡烏氣：「呢個獎唔易攞，06年又係所謂大熱，嗰時拍《肥田囍事》要增肥但食白果，好大壓力！當時有好多負面Comments，自己跌落谷底，爬唔番上嚟……珍姐（曾勵珍）喺我失意時同我傾偈、鼓勵我，話唔會睇錯人，仲有Stephen（陳志雲）、粉絲、經理人同爹哋媽咪！」

攞埋最喜愛角色

杏兒向男友黃宗澤（Bosco）發表肉麻的「廁所宣言」：「仲有一個人喺呢段時間對我好嚴厲，佢好緊張我……尋日發生段小插曲，佢對記者講話我攞獎會去廁所，但佢冇去廁所，我知道自己有好多缺點、好難頂，但你都好多缺點，你都好難頂！我希望我哋一路頂住大家﹗」台下的Bosco即大笑，鄭裕玲即叫他錫杏兒，但Bosco只叫：「頂住﹗」最後，杏兒與Bosco在阿姐汪明荃撮合下，終於肯相擁合照，場面溫馨甜蜜。杏兒受訪時被問到與男友擁抱是否冧爆？她說：「你哋覺得冧就冧！（Bosco有乜難頂？）每人總有優、缺點。（佢脷短？）係呀！呢個囉！同嘉穎攞到好開心，頭先多謝漏咗樂小姐，唔好意思。」

其實杏兒奪視后前，先憑《怒火街頭》的「王思苦」膺我最喜愛的電視女角色獎！當宣布賽果時，她一臉愕然，似乎未有心理準備獲獎，還哼了兩句《忐忑》，似表達其心聲，她領獎時又邊搖頭邊說：「死啦！點算呢？我真係唔知講乜嘢好……多謝TVB、監製同『Law霸』（鄭嘉穎），希望一陣仲有得講﹗」她事後受訪時表示沒想過攞該獎，本身心水是鍾嘉欣。至於杏兒與Bosco賽前齊獲網民票選「非凡風采男/女藝員」獎，領獎時被一班藝人起哄叫「求婚、結婚」，令兩人尷尬致辭。

等足多年再得獎

99年當選港姐季軍的杏兒，入行12年曾參演多部劇集，但僅於02年憑《流金歲月》獲「飛躍進步女藝員」獎，之後雖再有提名，但每次也與獎項擦身而過。當中最令人留下深刻印象是06年於《肥田囍事》增肥40磅演出，惟最後鎩羽而歸，敗給憑《鳳凰四重奏》起孖的佘詩曼。事隔五年，杏兒終初嘗雙料視后滋味，可喜可賀。

杏兒Profile

年齡：32歲

入行經過：99年奪香港小姐季軍及活力風采獎，她曾為配合《肥田囍事》角色增肥至152磅，提名最佳女主角。06年及今年分別憑《我的野蠻奶奶》和《萬凰之王》奪《astro我的最愛頒獎典禮》的「我的電視至愛女主角」。