趙碩之陳靜陰招擒餓狼

坊間風化案愈來愈多，甚麼露體狂、偷拍狂、跟蹤狂已屢見不鮮，搞到港女人人自危，宅男女神趙碩之及陳靜決不坐以待斃，各自秘練防狼術，招式毒辣，足令狂徒聞風喪膽，再加上暗技「十指不沾酒水」，今勻大可齊聲講句：「靚女不怕了！」

身材「胸」湧的「胸模」趙碩之（Wylie）入行三年期間，所到之處勢必人頭湧湧，她三年前舉行的寫真簽名會，因為出現逾千人的人龍，活動被迫腰斬！除了傳媒及她的忠實粉絲，當然少不了一班逢騷必到的龍友。被龍友圍住喪影，她已司空見慣，亦從不擔心他們會做出越軌行為：「佢哋唔敢亂嚟，有啲粉絲甚至會自發性咁安排好秩序嚟保護我！」反而她近來密密北上打碟搵人仔，終於見識到內地粉絲的「熱情」，但她慶幸內地保安森嚴，很少出事：「內地有啲粉絲有時攞住個啤酒樽好似想爆樽咁！」

睇電視學自衞

曾經有親戚給她防狼器、防狼噴霧等自衞器材，但她認為親自動手絕對比用防狼器更快！一、兩年前她看外國電視節目時，自學了一套「防狼術」，雖然從未派用場，但她講得頭頭是道：「人最脆弱嘅地方就係眼珠，第一招就係用兩隻手指公大力㩒落對方對眼度，第二招就係用兩隻手喺佢耳邊拍落去！呢兩個做法起碼令對方暈一暈，嗰一下唔知自己做乜，又睇唔到嘢，咁再求其伸佢一腳就得！」這兩招聽來兇狠，但Wylie認為這是生存法則，況且對方進一步有甚麼行動亦難以估計：「如果係熟人或者前輩可能會留手，但遇上陌生人就好危險，雖然明知會令對方受傷，不過點都會保護自己先！」

合照遭摸心口

她不諱言亦遇過抽水事件，她惟有見招拆招：「有次去內地登台，最後同個場嘅老闆合照少不免，點知佢個朋友搭住老闆膊頭，隻手『唔小心』掂到我心口！」當時她先留意在場保安反應，再觀察「抽水者」的狀態：「如果佢係醉咗，我做乜都得啦！可以即刻整開佢；如果佢清醒，咁就代表呢個係衰人，一定會講番畀公司同事知。」她又提到早前張栢芝出席活動時疑遭人「鹹豬手」一事，當時有保安被拍到用手攬實栢芝開路，其手竟觸及栢芝胸部：「栢芝嗰下都冇講出嚟，唔即刻出聲可能想避免尷尬。」有時她亦會跟其他演員食飯閒聊，但盡量滴酒不沾，尤其到外地工作時更會打醒十二分精神：「公司同事未必成日跟住我照顧我，做完嘢我會即刻返房，好似冇禮貌、唔識應酬咁我都唔理，畢竟人生路不熟。」

現年22歲的陳靜（DaDa）出道近兩年，憑33D驕人上圍於模界殺出血路，經常晒「事業線」冧宅男，成為新一代「性感女神」！不過打扮性感往往危機四伏，不少女星曾有不愉快經歷。小時候亦曾於巴士上被摸大髀的DaDa，坦言遇上這種不愉快經歷的香港女性多不勝數︰「有邊個香港女仔冇畀人抽過水？我細個都遇過，不過咁細個邊識畀反應！但我好偏激，如果依家遇到一定會鬧佢，甚至用埋粗口，因為我要遏止呢啲行為，電視都有教啦！遇到呢啲事一定要出聲！」問會否出手阻止？她說︰「如果用口叫都唔停，會有機會出手，可能一巴打落去啩，當然遇到即刻走係最好，但我會鬧埋佢先，好蝕嘛！」她又認為事態嚴重必須報警︰「睇吓解唔解決到，但如果事件好嚴重，真係令自己崩潰，就一定要報警！」

攬吓腰都唔得

雖然DaDa自巴士事件後未再遇「變態男」，但她亦曾在工作時遇到過於熱情的對待，令她尷尬︰「有次出活動有外國人太熱情，摸我背脊攬腰仲貼到好埋，當時我驚一驚，可能大家文化唔同，但其實我連攬腰都唔得，除非大家真係好熟。嗰時惟有笑住褪後，唔想得失呢個客戶，我諗佢當時都Feel到我拒絕啩，之後冇再有親密身體接觸。」問到會否因而於工作時「封」胸？她說︰「唔會，女仔梗係貪靚，如果件衫靚但性感嘅我覺得冇問題，加上依家想多方面發展，好似拍戲咁，如果角色有發揮機會，就算性感都會拍，只要唔好過我底線就OK。」

DaDa激動地指身邊好友的遭遇更嚴重︰「有個朋友住唐樓好靜，試過畀個男人拉入防煙門，個男人仲要拎埋把刀想強姦佢，好彩有人行過，阻止件事發生！」問到當時有否報警？她說︰「佢話嗰個男人即刻走咗所以冇，但我覺得唔可以姑息呢啲行為，好在我個朋友事後搬走咗。」

食定藥保清醒

外表柔弱的DaDa原來亦是習武之人！因剛出道便要以性感作賣點，故年前她特地學功夫傍身，她說︰「出寫真嗰排要宣傳，打扮好性感，所以公司特登安排我搵師傅學詠春，不過只係好基本嘅招式。」DaDa還得師傅傳授一套「防狼術」，她笑言防狼術招式狠毒，生人勿近︰「好似插眼、踢對方重要部位，仲有防止人喺背面偷襲。之後我有同女性朋友分享呢幾招，慶幸到依家都未用過！」雖略懂防狼術，但她認為「酒」這種夜蒲必備的飲品還是少飲為妙︰「飲酒真係會控制唔到自己，見過有啲男仔酒後好似變咗隻狼咁，雖然有時出去玩都好難避免飲酒，但我會食解酒藥保持清醒。」

後記：習武得個「睇」字

Wylie近來不停練習一種來自巴西、含武術成分的運動「Tricking」，但她認為不太能用作自衞：「的確令我身手敏捷啲，但呢種運動包含大量花式空翻動作，冇理由有人非禮我嘅時候我打個側手翻！都係拍戲先用，實際啲。」

後記：曾為菲傭出頭

DaDa自爆曾為女傭罵走地鐵抽水男︰「入行前有次搭港鐵，見有個男人特登用手月爭不斷撞身旁菲傭胸部抽水，菲傭冇出聲制止，個男人當然繼續啦！我睇唔過眼出聲鬧佢，之後佢縮手咪急急腳落車囉！」見義勇為真值得大家學習。