Joey吼Eason放假搶大碟獎

樂壇天后容祖兒（Joey）去年與一眾英皇歌手杯葛《十大中文金曲頒獎禮》，昨日「重修舊好」出席有關記者會，她笑言明年有望趁陳奕迅（Eason）放假的好機會，衝擊對方常年霸住的大碟獎項。

昨日《十大中文金曲頒獎禮》舉行記者會，宣布明年1月7日假香港知專設計學院頒獎，只供傳媒及業界人士參與，不設觀眾入場，而受無綫跟四大唱片的版稅風波影響，「四台聯頒」獎項將會繼續從缺。去年缺席頒獎禮的英皇昨日派代表出席，包括Joey、Twins及陳偉霆等，Joey表示頒獎禮當日要到澳門開個唱，未能出席，問會否擔心失獎？她說：「冇得怕！又唔係鬥多嘅遊戲，其實我好想攞大碟獎項，不過年年都畀陳奕迅霸晒！我知佢下年唔出席頒獎禮，咁我就有機會啦！」

Kay御夫有術

而Eason透露明年4月在英國The O2 Arena舉行的演唱會，門票於開賣日20分鐘內售罄，打破國際巨星Lady GaGa的紀錄，成績僅次於米高積遜！提到繼續取消「四台聯頒」獎項，他說：「真係冇覺得唔抵，冇乜所謂啦！不過今年想投入啲，執正啲、整齊啲出席！」同場的謝安琪（Kay）大讚老公張繼聰乖仔，會將全數收入撥入她的戶口：「佢啲錢全數Auto Pay，殺無赦！佢出唔到蠱惑。」並笑稱採取溫和的高壓政策。