冼國林突放生 「鐘」還清白

捲入醉攬陳嘉桓事件的馬德鐘，事件曝光最初備受各界指摘，但陳嘉桓的師傅冼國林昨日突然召開記者會，揚言馬德鐘夠誠意並接受其解釋，但對陳浩民則咬實不放，據知下周還會循民事途徑向浩民追究！獲「放生」的馬德鐘昨晚回應記者時勁風騷。

馬德鐘與陳浩民攬錫陳嘉桓（Rose）事件，昨日再有戲劇性發展！Rose師傅冼國林與無綫高層樂易玲昨日突然聯手開記者會，吸引近百名傳媒趕到現場採訪。綜合整個記者會，冼師傅對馬德鐘及陳浩民態度各異，雖然接受馬德鐘解釋，但對陳浩民卻咬實不放！

席上，樂易玲率先發言並透露與冼師傅曾就事件會面兩次，並感激對方諒解及支持馬德鐘。她又指馬德鐘在記者會前曾來電，透過她感激冼師傅、Rose及其家人。冼師傅指馬德鐘已向他承認當時處理不當：「我問過陳嘉桓，佢話馬德鐘當時有以安慰方式拉佢埋嚟，問佢有冇事，手部冇觸及嘉桓嘅任何敏感部位。我哋唔可以因為有人覺得馬德鐘有抽水之心，就當佢有抽水。佢解釋當時飲咗酒唔識即時反應施援手，得饒人處且饒人，了解真相後唔會冤枉好人。」他又指馬德鐘主動道歉、沒有推卸責任及逃避、較有誠意、沒有指Rose借意上位及沒有貶低Rose等多個大前提下，決定作出諒解及包容。

「佢太太出咗好多力」

問到是否原諒陳浩民，冼師傅則說：「佢做咗唔應該嘅事，於法於理都責無旁貸，道義上係唔啱。」他指陳浩民在懺悔記者會上諸多掩飾、指黑為白：「連鞠躬幾多次都要寫埋出嚟，心裏都有答案！其實一出事佢已經唔誠懇，先話冇掂過嘉桓，然後解釋自己『好客』推卸責任，又話要帶眼識人，又指有人借佢上位、人紅是非多等，完全睇唔到佢有咩誠意，我唔考慮佢所謂嘅道歉。」問到早前備案是否向兩人作出控告？冼師傅若有所指：「我哋只係講事實，告邊個由律政司決定。我唔認為馬德鐘會被告。」他又替Rose早前指「兩位前輩變了另一個人」解釋：「一個突然變狼，一個謙謙君子不施予援手，寄望變咗失望先咁講。」最後不忘寄語馬德鐘珍惜眼前人：「佢太太出咗好多力。」

私人名義捐三十萬

談到馬德鐘曾因留言打算捐錢往東華三院而遭圍插，冼師傅指對方其實曾透過很多途徑找他，其中馬太找到一名冼所認識的東華三院總理作調停人。由於馬德鐘向該名總理透露道歉不足夠，該名總理才提議他捐錢，還撐他的捐獻是誠意，而不是掩飾錯誤。本報亦收到可靠消息，指馬德鐘已履行承諾，以私人名義捐出三十萬予慈善機構。

至於被指介入調停的樂易玲透露，馬太已到內地力撐馬德鐘，問到事件有否影響他與無綫之間的關係，她說：「一件事還一件事，當務之急係解決呢件事。」

至於獲「放生」的馬德鐘昨日繼續在橫店開工，晚上六時半乘車返酒店，但徘徊半小時始下車接受訪問，他說：「多謝冼師傅還我清白，多謝公司同樂小姐嘅勞心勞力，仲有同事、朋友同Fans嘅支持同信賴，特別多謝我太太，因為呢件事影響咗佢嘅工作同生活好緊要，亦都令到佢好費心，多謝佢嘅體諒，跟住落嚟會好專心好專注拍戲。」至於有指其太太已飛往當地陪伴左右，馬德鐘未有正面回應，但對離婚傳言則說：「傳言嚟啫！」當記者再追問如何向太太解釋等問題，他一概不作回應。