汪圓圓：唔想將來後悔

性格乖巧的汪圓圓向來順得人，不過她為圓演員夢不惜違抗父命，未有繼承家族生意。最終圓圓憑誠意及努力做出成績，令父親由不接受她在演藝界發展，變成她的忠實影迷。

由細到大，父母都好疼錫我，因為我又乖又聽話，所以佢哋從來冇打過我，媽咪仲話大聲少少鬧我我都會喊。不過，唔好以為我屋企嘅家教好寬鬆，其實相反，我父母係好傳統嘅人，對我同家姐嘅管教非常嚴格，尤其係結識朋友方面，由細開始，我同家姐嘅朋友都要帶番屋企見家長，但我好彩，身邊朋友父母見過都話好乖，反而家姐有幾個朋友唔合格。

雖然我好聽屋企人話，但係亦有反抗嘅時候。爸媽喺加拿大開珠寶店，爸爸好想我繼承父業，但我唔想，以前甚至覺得呢門生意好悶。我一直好鍾意睇戲，細個已經想做演員拍戲，不過，當年話畀人聽想做演員會畀人笑，因為我讀嘅小學大部分係外國人，對佢哋嚟講，中國人做演員機會好微，身邊嘅同學都係想做律師、老師或者醫生。

爸爸讚演技

後來，家姐同姐夫搬返香港住，我去探佢哋而有機會拍戲。最初爸爸好反對，佢唔鍾意娛樂圈，認為藝人唔係認真嘅事業，朝九晚五返辦公室先係返工。但我意志好堅定，想趁後生試吓，因為老咗唔會再有機會，我唔想將來後悔，都唔想畀爸爸睇死。依家有啲成績，爸爸已經接受咗我嘅職業，佢同媽媽會一齊捧我演出嘅電影場，仲讚我演戲自然，令佢哋覺得幾驚訝。爸爸認同我好開心，佢唔再好似以前咁要我繼承珠寶生意，但我為咗氹佢，前年去加拿大幾個月讀珠寶設計及鑑證，至於將來會唔會繼承父業就隨緣啦！（明日待續）