圓圓 Mark實蔡加讚：以結婚為大前提！

汪圓圓與玩具大王蔡志明兒子蔡加讚拍拖一年未滿，但默契十足，更已認定對方為結婚對象。圓圓大讚男友穩重又勤力，完全沒有富家子的習性，放心付託終身。

口述：汪圓圓　筆錄：名人組

今年對我嚟講係好特別嘅一年，因為我遇到佢—蔡加讚（Karson）！我哋拍拖差不多十個月，時間唔算好長，但感覺經歷咗好多，最難忘係第一次畀記者影到我哋拍拖。最初，我哋冇刻意去考慮公唔公開呢個問題，所以當時喺冇心理準備下畀人知道咗，真係不知所措！大家都唔知點處理。不過，Karson好好，佢話我哋拍拖光明正大，又唔係做咩壞事，畀人知道都唔需要擔心，我聽完佢講之後，覺得又係喎！於是就好坦然去面對。呢件事令我覺得大家一齊去經歷、去面對好有意義。由呢一刻開始，我哋知道以後會成為被拍攝對象，拍拖唔再係私隱。

咀嘴任睇尷尬

雖然一早有心理準備，但之前畀記者影到喺街頭咀嘴，係我意料之外。我一睇到報紙就話Oh My God！真係好尷尬！呢種事連我父母都未見過，估唔到會畀全港巿民見到！當時我有啲耿耿於懷，直至Karson安慰我話拍拖咁做好正常，係好Sweet嘅事，先令我冷靜落嚟，但以後會謹慎啲。雖然我哋算係公眾人物，但拍拖同普通人冇分別，而且我哋公開咗，所以邊度都會去，亦唔介意畀人影到。

公開後，我曾經擔心過外間會有負面批評，例如會話我為錢而一齊，又或者佢會畀人話有錢仔追Model之類。不過，實際上大家嘅反應好正面，我好開心！我同佢拍拖冇諗過佢嘅背景或者屋企係咪有錢，反而最欣賞係佢努力工作，靠自己唔係靠屋企，相反如果佢只係二世祖，冇自食其力嘅能力，我唔會同佢一齊，總之其他人點諗或者講咩我唔會理，只要我哋兩個明白就可以。

Karson真係好勤力工作，比我更忙，大家一有時間就會爭取見面，而且佢好孝順，同家人感情好好，所以如果可以我會同佢一齊參加佢嘅家庭聚會。有時佢為工作而冇時間見面，我絕對唔會投訴，因為我明白工作要緊，呢方面我會好體諒同支持佢。

似姐夫甄子丹

除咗欣賞Karson努力之外，佢心地好、處事公正又穩重、思想傳統，呢幾方面同我姐夫幾相似。以前可能受到家姐同姐夫影響，當我開始想拍拖嘅時候，以為搵個年紀大好多嘅男朋友，思想會成熟啲，可以照顧到自己，好似姐夫咁！不過，我同Karson拍拖後，我發現年齡冇所謂，最緊要溝通到，雖然佢同我同年，但佢思想好成熟，我哋溝通得好好，有時好似心有靈犀咁，只係一兩句說話，就會意會到大家想講乜，大家嘅諗法好相似，有時我講笑話，只有Karson會明我講乜，會識笑。

有件事我覺得幾有趣，就係每次做訪問，記者都會問起男朋友，最常問係幾時結婚，估唔到結婚呢個話題，同我講得最多嘅唔係Karson，而係同記者。不過，咁樣即係證明大家都想我哋有好結果啦！我哋拍拖係好認真，當然係想有結果先開始，係以結婚為大前提，但結婚要睇緣分，我哋仲年輕，想先為事業打拚，而且依家相處得好開心同舒服，暫時未有結婚計劃。（明日待續）

Profile

英文名：Irene

年　　齡：25歲

三　　圍：33B、24、35

身　　高：174cm

入行經過：2006年跟隨姐姐兼多倫多華裔小姐汪詩詩來港發展，加上有姐夫兼「宇宙最強」甄子丹這個強大後台，汪圓圓曾先後接拍電影《導火線》、《最強囍事》等，更以模特兒身份入行，並曾和熊黛林同一公司，成為熊黛林師妹。