陳浩民否認越軌：最多咪搭吓膊

有關攬錫陳嘉桓（Rose）一事，身在內地的陳浩民昨日接受電話訪問時勁愕然，他說：「我做過啲乜嘢呀？（佢話你事後有同佢講唔好意思？）點解要同佢講唔好意思？我哋尋晚係去消夜，眾目睽睽下我做得乜嘢出嚟？（有冇攬錫？）冇！點會呀？最多咪哄埋佢耳邊講嘢或者搭吓膊頭，如果咁嘅接觸佢都覺得唔舒服，我咪打電話同佢講唔好意思囉！我完全冇心對佢做唔尊敬嘅事！（係咪飲醉酒？）飲少少但清醒，我仲揸電單車返屋企！（老婆知道？）唔知！我都好擔心你哋會點寫，因為我老婆就快生，一陣嚇到佢早產！」身在內地的馬德鐘在電話中只說：「我同佢（Rose）講秘密，諗住想整蠱陳浩民，所以哄埋佢度。（有冇攬住佢？）冇！哄埋啫！（講咩秘密？）整佢食羊鞭囉！」

至於洪天明當時亦在場，但他昨日在電話表示因飲醉酒而不清醒：「我迷糊印象中，浩民玩食羊鞭，問Rose食唔食，但Rose覺得好核突好驚，浩民先咬住羊鞭哄埋去要佢食，先至有錯覺係錫佢啫！（有冇見到攬？）係扶嘅動作啫！以我所知浩民真係玩o架！」