大壽vs台慶 阿佘陪阿媽唔撐娘家
積極北上搵人仔的佘詩曼及林保怡，昨日畀面監製戚其義，返港與陳豪、邵美琪及黃德斌等宣傳無綫新劇《天與地》。席間播放已故藝人陳鴻烈片段悼念，阿佘為之感觸，金燕玲更不禁落淚。
Rock女造型的阿佘坐下時不慎露出金色底，她透露前晚因母親六十大壽而沒有欣賞台慶騷：「入行咁耐都冇機會同媽咪慶祝生日，所以佢今年好開心，送咗現金同卡，同媽咪有聯名戶口，啲錢佢可以任攞！（傳謝天華、胡杏兒係內定視帝視后？）邊有得內定o架！（睇好邊個？）揀一個驚得罪人。」事先張揚不出席台慶頒獎禮的阿佘，卻會出席翌日的梁靖琪婚禮：「大半年前應承佢，所以一定到！（驚無綫詐型？）冇咁小器。」與無綫尚有一部劇集合約的她，直言恨拍《金枝慾孽II》，而林保怡對《天》劇收視有信心，更揚言：「無論故事、班底同演員都好過台慶劇！」
北上賺到笑的林保怡（右起）及阿佘，莫非與黃德斌分享心得？
邵美琪（右）貫徹角色性格，「依賴」劇中姊姊金燕玲。
沖開咖啡的陳豪，即場為大家分配飲品。