滕麗名朱慧敏「配」你吾喜

在娛圈上位，可以靠緋聞、炒是非博見報，無綫小生花旦更可藉台慶頒獎禮攞獎，繼而名利雙收。今年有份角逐女配角獎的滕麗名與朱慧敏，卻未見有「大動作」為自己拉票，反而以不變應萬變，只求劇中的新挑戰演出，贏取觀眾認同，便是最大回報及最高興！

現年35歲的滕麗名入行15年，古裝、時裝及喜劇作品多不勝數，她自言曾試過劇接劇拍足一年，雖然辛苦，卻享受演藝工作︰「試過一年拍四套劇，仲要係一套劇頭接住另一套劇尾咁拍，嗰時個人會有啲混亂，拍緊古裝但同時要開始拍時裝，有時坐低化妝，都搞唔清自己要Set咩頭。」

雖然時間差不多被工作填滿，但阿滕不認是工作狂︰「我係鍾意工作，唔可以冇嘢做，但未至於係工作狂，我會同朋友食吓飯、開心吓，而且我有屋企，會陪屋企人。」

年年有提名

要數阿滕最為人熟悉的作品，應是一系列《陀槍師姐》，相隔多年，她今年由女警變單親家庭師奶仔，以新形象演出劇集《怒火街頭》，對於作品受歡迎，她當然開心，但原來當初接拍此劇時，她只知道角色，但未知拍攝「內容」，她說︰「套劇係一路拍、劇本一路寫，當日斟拍嘅時候，只知道做一個師奶師爺，角色變得咁受歡迎係機緣巧合。TVB咁多劇，成日都係一路拍一路寫，份劇本啱啱印出嚟熱辣辣都試過，我覺得咁樣都唔錯，畀到自己一個新鮮感。」

在公仔箱多年，阿滕幾乎每年都有份提名台慶頒獎禮，今年也不例外，憑《怒》劇角逐女配角獎，但總是與獎項擦身而過的她，問到會否想一嘗攞獎滋味？她笑說︰「年年都有提名，不過呢個獎都係隨緣啦！攞獎我梗係想，但有好多因素嘅，總之獎項嘅嘢，我真係冇去諗。」提到對手呼聲甚高，她只婉轉地說︰「我呢排忙住工作，講真，冇乜留意有咩對手，可能未必關對手事呢！」

北上搵人仔

即將有更多免費電視台成立，令無綫掀起一陣挖角潮，雖然多年來與獎項無緣，別人眼中的她亦應該出外闖一闖，但與無綫簽部頭合約的她卻發表忠心宣言︰「有良性競爭係好事，之前都有人搵過我，但唔會走，一來TVB養大我，二來加薪同開嘅條件都好滿意，大家都好有誠意去合作，同埋好有屋企嘅感覺。」

近年圈中掀起北上搵銀潮，阿滕亦是其中一分子，她說︰「返內地拍劇除咗價錢吸引，又可以打開內地市場，而且佢哋拍嘅題目都好特別，唔單止有談情爭鬥呢類題材，仲會有歷史元素，我之前拍過一啲關於國家題材嘅電視劇，真係可以學到同試到好多嘢。」

後記：有「仁」氹開心

目前阿滕忙拍處境喜劇《結．分@謊情式》，劇中與音樂人陳奐仁有不少對手戲，談到這位拍檔，阿滕說︰「佢係好好嘅拍檔，可能新人會拎最可愛自然一面畀人睇，同佢拍劇有火花，大家Jam吓歌，充滿歡笑聲。」以歌會友也許就是陳奐仁氹阿滕開心的方程式。

朱慧敏（Queenie）04年當選港姐亞軍後，順理成章加入無綫拍劇，近年產量愈來愈多，無論劇情片、喜劇或處境劇都見到其蹤影，高峰期更試過一年有七套劇見街！Queenie也自認是工作狂，還笑言向公司承諾四大保證：「我同公司講，我唔怕辛苦、好鍾意做戲、唔會NG、點都會返到工！反而係佢哋擔心我得唔得？話如果真係唔得，一定要出聲。」Queenie多年的努力並非白費，前年她打入台慶頒獎禮「飛躍進步女藝員」最後五強，去年憑《飛女正傳》中搞笑波妹角色提名最佳女配角，今年再接再厲，於《點解阿Sir係阿Sir》中飾演黑幫阿嫂的她再度入圍爭女配。

感激劉家豪

於《點》劇演出叫人眼前一亮，但原來Queenie接此劇前有很多猶豫，擔心戲路被定型：「一聽到話演黑幫老婆，即係做『阿嫂』啦！好擔心，唔想成日演反派或者好有機心嘅角色，驚啲觀眾覺得每次我出場都係搞風搞雨，唔想有呢種感覺！」後來她被監製劉家豪的誠意打動決定接拍，估不到劇集出街後，角色引來極大回響，令她始料不及：「有觀眾同番我講，我喺劇入面畀警察捉，喺法庭、監獄嗰幾場戲，佢哋睇得好緊張，心痛又感動，有時我嗰場戲未喊，佢哋就已經喊咗！」她笑言沒有刻意設計角色的種種，只是相信劇本及與其他演員交流互動。談到奪配角獎變相成為捧上一線的指標，下一個目標自然就是視后，Queenie即笑言要慢慢來：「希望有咁嘅一日！」

冇諗過離巢

對於來年或加入更多免費電視台的競爭，Queenie認為更多電視台對整體業界是好事，良性競爭永遠是好事：「觀眾可以有多啲選擇，希望見到好似七、八十年代，電視媒體百花齊放！」她不諱言有其他台招手，但笑言TVB是她大學畢業後第一份工，充滿感情：「有其他公司搵過我，都多謝佢哋賞識，不過無綫一路畀好多機會我，做得好開心，幕前幕後都合作得好愉快，見佢哋仲多過見屋企人，有濃厚感情。」

不少藝人北上搵真銀，部分叫價高達16萬元人民幣一集，Queenie說：「內地市場大，我都好想去內地拍劇，不過唔係因為錢，係想睇吓人哋啲製作係點，好似交流生咁！」

後記：圓「制服」夢

Queenie一直恨演着制服的角色，將於《女警愛作戰》演警員圓夢，而於《護花危情》中演心理醫生，由於屬專業人士，她要努力刨書、刨電影：「就算外形似警察、醫生，如果冇嗰樣氣質或者知識，咁就只得個殼！」她表示平日會觀察身邊的人和事，從中偷師。