Rosanne停餵母乳養生追女

女星黃婉君誕下囝囝後便專注湊仔，現時囝囝已7個月大，肥肥白白十分健康，而她亦準備追多個女，令家裏更熱鬧！

今年初升任媽咪的黃婉君（Rosanne），對囝囝愛護有加，雖然辛苦，但她覺得十分值得。為了讓囝囝健康成長，她選擇餵母乳︰「囝囝一出世就餵母乳，雖然比較辛苦，要飲多啲湯水同均衡飲食，但母乳營養高啲，犧牲大都值得！」不過，囝囝近日開始轉食奶粉，因她打算追第二胎︰「最近我畀佢轉食奶粉，因為我準備生多個，停餵母乳，係想自己身體更健康。」她指囝囝腸胃適應得快：「開頭驚佢食唔慣，好在冇唔舒服。」問到第二胎想生仔還是女，她說：「我想生女，湊個『好』字，但生兩個就夠晒數喇！一個易照顧但難教，反而兩個會好啲。」

斟戲明年復出

囝囝出生後，Rosanne全心全意在家湊仔，她坦言很享受親子時間︰「其實湊仔冇想像中咁辛苦，我每日都抽時間同佢玩，因為溝通好重要，而且呢個時候嘅BB吸收好快。」忙於照顧囝囝的同時，她每星期都會跑步做運動，並打算復出工作︰「傾緊一部電影，下年開拍，如果懷孕嘅話，到時再算啦！」