謝安琪為民發Sing

歌手謝安琪因向來敢言，多次慘遭狠評，其實她之所以如此，乃因她對社會的一份關心與路見不平的性格。若阿Kay要尋找自己的快樂的話，她其實更希望社會大眾先得到快樂！

謝安琪（Kay）在圈內遇過不少不愉快事件，她要快樂談何容易？她說：「關心世界係我嘅個性，最初我覺得開心係我自己一個人嘅事，不過我發覺如果呢個世界嘅人都有幸福的話，我會更加快樂！因為呢個世界雖然唔公平，但好多人都好努力咁生活！」剛推出的新碟《你們的幸福》，碟名已隱含她「後天下之樂而樂」的想法。

Kay認為香港是全球貧富懸殊最嚴重的地區，特別是大角咀區，赤貧的草根階層與有錢人接鄰，實在相當諷刺！她曾在該區做社區節目，當中有一名靠綜援生活的兒童，有一個不敢說出來的心願：「佢想去戲院睇3D電影，對好多人嚟講咁簡單嘅事，對於每個月只有3千蚊收入、住劏房嘅家庭係太奢侈嘅夢想！」最後她找到一間願意為赤貧小童提供免費場的戲院，完成小朋友的心願。

少啲標籤更溫柔

Kay關心社會不只口講，還在新碟唱出來，好像新歌《十二月二十》就是描寫世界末日時，只有有錢人可以在方舟上快活逃生，窮人則呆在家等死：「有好多新來港人士都面對緊呢個困境，好似《潔淨王后》、《浮雲》兩首歌就係講佢哋嘅苦況！」她認為做歌手對她是莫大的幸福，因為除了是喜愛的事外，更可利用歌手的力量為社會發聲。雖然世界不公平，但她認為快樂仍存在：「有時好多痛苦係不必要，將心比己、少啲標籤人，生活可以好溫柔！我特別放《大城小動》呢首歌喺唔開心嘅歌後面，希望溫暖人心！」