大肚Kelly湊返學唔敢抱蝦餃仔

星級潮媽陳慧琳人工受孕成功，再度有喜！懷孕逾3個月的她，昨日仍湊「蝦餃仔」劉昇返Playgroup，但為護胎僅挽書包，未有親自抱仔！

昨晨9時許，一身便裝的陳慧琳（Kelly），在女傭及經理人鍾珍陪同下帶囝囝返Playgroup。向來錫仔錫到燶的她，為護胎而將抱仔重任交予傭人，但依然親自為囝囝拿書包。

均衡飲食胃口增

可能時間尚早，睡意仍濃的蝦餃仔不時捽眼兼眼瞇瞇，非常可愛！到中午放學時分，Kelly等折返湊放學，今次蝦餃仔明顯較早上精靈，更在媽咪教導下，多次向記者揮手及飛吻道別，小動作多多。

對於有家長表示平日多數見爸爸Alex送蝦餃仔上學，Kelly返回家中休息後接受本報電話訪問，她解釋早陣子忙於拍戲，才將湊返學重任交予老公：「佢怕醜所以今日冇出現，平日許可嘅話，我都盡量自己送蝦餃仔返學！」

近日胃口大增的她表示，醫生吩咐她保持均衡飲食，暫不服用補品，而奶奶及媽咪則經常送上愛心湯水。問到計劃順產還是開刀分娩，她表示會聽從醫生指示，但強調BB一定在香港出生。