古仔黃百鳴暗中護陳慧琳

陳慧琳再度有喜的消息，令一眾《八星抱喜》拍檔開心不已，其中黃百鳴一早接獲喜訊，並暗中「保護」她，而「另一半」古天樂則搞笑地表示，慶幸沒有阻礙大肚婆休息！

主演2012年賀歲片《八星抱喜》的陳慧琳（Kelly），得悉成功懷孕後第一時間通知《八》片出品人黃百鳴，並獲對方體諒，日後「攞正牌」不用到內地巡迴宣傳。原來拍攝期間，黃百鳴已體貼地暗中「監察」Kelly的戲份，免生意外，並為她保密。

免到內地宣傳

直至日前拍煞科戲，導演安排眾演員擁抱耍樂，以營造過年的歡樂效果，由於向來玩得的吳君如及甄子丹等在場，黃百鳴被迫捉古天樂到一旁將「秘密」告之：「我驚佢哋失驚無神抱起Kelly拋高，所以先講出嚟。（唔介意Kelly去唔到內地宣傳？）梗係唔介意啦！我想佢生個肥肥白白嘅BB呀！」

至於在片中與Kelly是一對的古仔，昨晚在公開活動上說：「佢喺片場完全冇（懷孕）迹象，我哋嘅戲份仲先後去過森林、海邊同地盤添！好彩今次差唔多都係日班戲，冇阻住大肚婆休息。（打算送咩畀佢？）會問吓佢嘅意見先，免得同其他人撞嘛！」

阿澤讚身手好

與Kelly對手戲不多的杜汶澤，昨日得悉喜訊後開心地說：「嘩！咁開心！佢喺片場活力充沛、身手敏捷，一啲都睇唔出。佢咁積極工作，又有美滿家庭，好戥佢開心。」而身在內地工作的甄子丹亦替Kelly開心，並透過助手恭喜她。