再做人工受孕Kelly得咗
娛樂圈喜事一浪接一浪,繼多位女星先後出嫁後,歌手陳慧琳(Kelly)成功走出小產陰霾,昨日肚凸凸宣布第三度懷孕!她還透露今次同樣是人工受孕但只是單胎,還已推Job安胎,準備迎接小生命的來臨!
年屆39歲的Kelly於年初經歷人生最痛的日子,於3月11日在Blog宣布因流產痛失孖女。眾所周知,她一直希望為劉昇(蝦餃仔)添弟妹,故在身體及精神恢復過來後,與老公劉建浩(Alex)繼續人工受孕,即使再冒作高齡產婦的危險依然大無畏,最終宣布這件超級喜訊!
Kelly昨日出席《DAKS 2012春夏女裝時裝展》時拋棄最愛的高踭鞋,穿上平底鞋及露背Halter Dress,肚凸凸到場睇騷。現場所見,她明顯升Cup,又收起平日的跳跳紮及不時用手遮肚,行路更特別小心。當記者上前恭喜時,Kelly帶點愕然,然後望望經理人及助手,隨即公布喜訊!
琳:陳慧琳 記:記者
記:有咗幾個月?
琳:其實都講得喇!
記:係咪有咗超過3個月?
琳:都係嘅!
記:今胎係仔定女?
琳:未知住,依家仲未照到,仲未去到呢個階段!
記:今次佗一個BB?
琳:係!都係人工受孕。
記:今胎會唔會好辛苦?
琳:未知住,我諗都係同第一胎差唔多!
記:之前你成日着高踭鞋,今日唔着係咪因為要特別小心?
琳:之前未見肚就冇所謂,見肚後為怕失平衡,真係驚跌親,所以改着平底鞋。
記:全家上下都知?囝囝知唔知?
琳:係呀!佢哋都好開心,但囝囝就未知。
記:囝囝仲有冇扭你抱佢?
琳:我冇抱喇!都係工人抱,佢太重真係抱唔起。
記:會唔會繼續工作?
琳:主要拍廣告。
記:咁會唔會停產?
琳:唔可以用停產嚟形容,但就推咗內地二、三十個騷,坐飛機表演嗰啲就唔會考慮喇!
暫時繼續拍戲
記:老公有冇叫你停工?
琳:冇呀!反而有問醫生使唔使成日瞓喺床度,但醫生話唔使,叫我放鬆啲同唔好緊張。我覺得間中做一、兩單OK,好過成日喺屋企亂諗。
記:拍《八星抱喜》時,其他演員知唔知你有喜?
琳:冇話畀佢哋聽呀!怕佢哋知我有咗就會就住我,我會小心啲!唔驚!主要係文戲,都係行行企企。
記:老公有冇幫你湊仔?
琳:佢幫唔到我好多,不過有幫我抱仔。依家晚上好易攰,尤其食完飯後,所以會少食多餐,唔可以食太多!
記:咁你依家喺屋企做女王?
琳:唔係,不嬲都唔興。
記:預產期幾時?
琳:唔方便透露!
整個訪問中,Kelly有問必答,難掩開心之情,經常展現笑靨。訪問完畢後,助手隨即為她蓋上披肩,以防她冷親!
陳慧琳宣布人工受孕成功,懷孕超過三個月。
肚凸凸的陳慧琳獲大會厚待,全程有專人服侍。
出手護肚
陳慧琳出席活動時為免人多擠迫有閃失,全程出手護肚。
專人護駕
陳慧琳獲保安護送離開,小心為上。
陳慧琳為「蝦餃仔」添弟妹,但原來他仍未知情。(資料圖片)
陳慧琳佗孖女時甚為小心,曾被拍得往檢查。(資料圖片)