婷婷禁男友做鐵騎士

謝婷婷昨日踢爆父親謝賢駕駛電單車時，曾因睡着而險喪命，故禁止男友安志杰學電單車，認為他未有足夠判斷力，不過她自己想學，笑言有雙重標準。

婷婷昨日以黑色皮褸的型格打扮，到澳門出席新濠天地冠名贊助澳門格蘭披治電單車第45屆大賽記者會，同場有今年兩位大熱賽車手，分別是來自美國的Jeremy Toye及英國的Gary Johnson。婷婷對車手的心得及賽前感受大表好奇，她聽聞車手的頭盔不可讓外人觸摸：「好似我打網球比賽，頂帽七日唔洗，呢啲係迷信，尤其中國人更有呢啲小迷信。（想學電單車？）都想，因為對拍戲有幫助。（唔驚危險？）都驚，但意外就係意外，就算平時出街過馬路都會有意外。」

自嘲雙重標準

男友安志杰一直想學電單車，但仍未得到婷婷批准，她說：「佢成日哦我畀佢考，但我唔畀，驚危險，電單車係好快速度，半秒就要做決定，我覺得佢會做錯決定，但我又想學，覺得自己雙重標準，如果一齊學都可以試吓。」

謝賢「睡」駕險死

婷婷還踢爆父親謝賢揸電單車時曾睡着，幸而未有賠上性命：「爹哋有揸哈利車，試過同40個老友揸電單車穿州過省。有一年去上海，佢揸揸吓途中瞓咗，跟住跌咗落個窿，旁邊係懸崖，如果跌歪少少就會冇命，真係好好彩！」她又表示16歲時坐過父親的電單車，當時還不需戴頭盔，食了不少塵：「嫲嫲曾經同我講，爺爺當時追佢都係揸電單車，半夜三更揸車接佢，好浪漫！」