黃宗澤出衫招撐杏兒封視后
無綫花旦胡杏兒前晚出席聖誕亮燈活動時透露，下月中到內地拍劇：「酬勞OK！賺人仔都可以呀！（痛失浪漫聖誕？）工作緊要！我係工作狂，就算結咗婚都繼續工作。（有冇計劃幾時結婚？）冇咁快！（攞完視后先？）呢個都係目標之一，攞完要更加努力工作。（攞視后酬勞可倍增？）公司傾嘅，但我向來都抵用！」
至於男友黃宗澤昨日出席《中國達人秀》招募活動，身穿杏色衫的他被取笑撐行女友，但呻杏兒在訪問中稱他為「腳背」：「佢真係大膽，踩到我上心口！好彩唔係腳板底！（杏兒叫你遲啲先攞視帝！）預咗啦！對手咁強！（上網投女友一票？）佢咁講我仲投佢？把口撐佢算啦！」
黃宗澤着杏色衫見高層樂易玲，拉票拉到出晒面！
胡杏兒表示聖誕節要開工，未能與男友浪漫一番。