王浩信凸肚YoYo婚後不設防

王浩信（Vincent）與陳自瑤（YoYo）在6條1的好日子註冊結婚，昨日再擺喜酒，YoYo雖谷奶兼凸肚上陣，但Vincent卻不認雙喜臨門，但表示婚後不設防。問到為何不請緋聞女友莊思明時，他表現緊張。

無綫藝員王浩信與陳自瑤筵開22席，藝人陳法拉、胡定欣、葉翠翠、李丞責、劉倩婷、梁靖琪、馬賽和苗僑偉等亦有到賀。Vincent近日被指曾力追莊思明，問到可有請對方？Vincent反應甚大說：「點解要請佢？有好多同事都冇請！我哋好恩愛，冇嘢影響到！」YoYo亦幫口解圍，並稱打算再到小島行婚禮兼度蜜月，可惜要工作，只好押後至明年才實行。

婚紗造成錯覺

昨晨由陸永、C君、羅仲謙及黃長興等組成的「戥穿石」與圈外人組成的「姊妹團」玩接新娘，而長興的女友Peggy亦有份助興，姊妹用苦瓜、榴槤、芥辣、辣椒粉和檸檬汁，精心「炮製」的五味蛋糕，搞到眾「兄弟」嘔吐、Vincent食到胃痛，但新郎最終以5位數開門利是抱得美人歸。

約4時一對新人再在結婚蛋糕前拍照留念，互相親吻。孕味濃的YoYo在白色Tube Dress婚紗下，胸前繼續「谷奶」並凸出小肚，惟Vincent力撐YoYo沒有身孕：「佢上面就凸！不過我哋努力中，不設防，緣分嚟就會要！」YoYo則解釋因婚紗多縐褶位才產生「凸肚」的錯覺：「呢件古典風嘅婚紗我搵咗成個月。（首飾？）有贊助，8位數字，但一對重手嘅龍鳳鈪奶奶已經送咗畀我，今日着婚紗唔襯冇戴。（婚禮用咗幾錢？）好多贊助減輕咗我哋負擔！」