容祖兒守法絕不醉駕

歌藝出眾的容祖兒（Joey）平日愛享受駕駛樂，對於近日黎明旗下歌手李治廷涉嫌醉駕，她自爆駕駛技術麻麻，但絕對是個守法的好司機，堅拒酒後駕駛：「我都唔願意冒呢個險。」

正物色輕型車的Joey，前晚跟雷頌德等在銅鑼灣出席汽車品牌FIAT新陳列室開幕禮，她坦言睇中場內名車，又透露享受遊車河：「好多人都以為我唔識揸車，因為我成日坐保母車，其實我最鍾意漫無目的咁揸車，最緊要知道點返屋企。」

對於黎明旗下歌手李治廷日前涉嫌醉駕被捕，Joey立即肉緊地提醒大家切勿醉駕：「唔好醉駕，好唔抵！知自己會飲就唔好揸，依家捉得好緊！希望大家警惕，我都唔願意冒呢個險，有一年我生日因為飲咗酒，雖然揸車出去，最後搵朋友開車送我返屋企。」

「揸車似打機」

Joey笑言，曾試過駕車等紅綠燈時，把握時間化妝：「嗰時啱啱開始拍劇趕住入廠，好彩咁耐都未試過有交通意外！」雖然Joey喜歡駕車，但技術卻有待改進，她指Yumiko坐過她的車後，形容她「揸車似打機」！Joey又試過駕車送朋友回家行錯路，由於她的駕駛技術「技驚四座」，經理人Mani即使趕時間都不敢坐她的順風車。