梁慧恩：唔明公司諗乜！

播出三個月的亞視王牌節目《香港有飯開》雖有口碑，卻傳因亞視財政問題慘被開刀，將於本月18日停播，換來只需播藝人微博片段加主持發聲的是一個低成本節目《微播天下》。

收視長期積弱的亞視，難得《香港有飯開》有口碑、收視不俗而開香檳祝捷，一度振奮台前幕後，即使主持何守信一日捱34元生果金、蔡國威捱一星期公仔麵、梁慧恩（Viann）食足一星期奇異果而屙到暈等慘況，他們都心甘命抵，無不齊心做好節目。

低成本節目取代

可是日前有傳由於亞視財政問題，令《有飯開》Sharp Cut變「冇飯開」之餘，更以只需播藝人微博片段，加上主持發聲的低成本節目《微播天下》取代，一眾台前幕後都於網上群組發聲，大嘆可惜及不捨，大部分人更表示不明白為何節目做出此等佳績都不能繼續。

Viann昨日接受記者訪問時，坦言今次公司將節目Sharp Cut令她大感意外：「好可惜呀！台前幕後知道咗都喊呀！難得亞視有個節目咁齊心成績又好，都唔明公司諗乜！」而何守信昨日亦承認節目完結，大呻可惜：「我都唔知點解！你話財政問題咩？我都打聽過，但《香港有飯開》冇超支，所以我都好無奈，唯一希望公司只係想將節目停一停，見好就收再重新嚟過，都係一件好事，而我就剛好同亞視合約滿！」