Crystal@HotCha 遊英餐餐四舊水

HotCha成員Crystal是圈中出名的慳妹，但早前到英國旅行時，竟肯放開「銀包」一嘗做豪客，每晚品嘗逾400港元起的晚飯，雖然豪食兩星期，可惜未見成功增磅。

足有兩年沒好好休息的Crystal，日前終於成功請假到英國旅行兩周，除踏足英國名勝，包括倫敦最大的朱古力商店、Nottinghill Gate及音樂劇院等，又進行增肥大計，每晚都喪食豐富晚餐。

Crystal表示此行大飽口福，每晚都有朋友帶她到不同的主題餐廳食飯：「每餐都食四百蚊港幣以上，因為英鎊高企，一支水都要成20蚊港幣，所以唔可以唔豪番次！最開心係我去到一間好豪裝嘅餐廳食到最愛嘅Egg Benedict！」不過她自爆曾為了慳錢而不吃早餐，把金錢都花在晚餐上。問到可有成功增肥？Crystal失望地說：「我又唔覺喎！可能要加倍努力。」

通街靚仔零艷遇

最讓Crystal開心的是可以撲到靚位飛，欣賞倫敦最著名的音樂劇《Wicked》，她指台上每位演員都能歌善舞，尤其女主角的歌聲更打動人心，令Crystal找到自己的夢想。問她可有遇上靚仔？Crystal表示滿街都是美男子，可惜未獲搭訕：「可能佢哋唔鍾意咁瘦嘅女仔啦！」

她又指此行圓了其多年夢想，因為她是標準的英國迷，不僅熱愛英國足球隊，又迷戀英國的建築物：「紅色郵筒喺香港街道逐漸消失時，我曾經因為呢件小事傷心過，今次我終於可以同紅色郵筒合照！」