趙哲妤擇偶 最緊要識食

身形高瘦的中國小姐趙哲妤原來胃口甚大，面對最愛美食即變「無底深潭」，她亦要男友陪她搵食，征服她的胃便可俘虜其芳心。

中國小姐趙哲妤（Uny）早前推出寫真，苗條身形令不少人羨慕，但其實她十分愛吃，這日Uny到意法餐廳歎西餐鋸扒食扇貝，即「狼」相盡現狂擦美食，當她歎甜品時更瞇晒眼一臉享受：「食嘢係人生一大樂趣，我會用狂食減壓！我又好鍾意飲湯，最高紀錄連飲七碗，令身邊啲人都好驚訝！（唔怕肥？）做多啲運動囉！我鍾意游水同行路。」提到最愛的食物，她即講不停：「我鍾意食海鮮、點心同蛋糕，亦都好鍾意食水煮魚同麻辣火鍋呢啲辣嘢！（唔驚皮膚唔靚？）唔會，反而愈食愈靚！哈哈！」

兒童樂園玩到癲

非常重視美食的Uny，揀男友亦與食有關：「最好同我口味差唔多，咁就有共同話題，如果佢可以陪我周圍搵食，就更加好喇！」

此外，大細路的Uny平日仍會到兒童樂園玩，故希望男友也有童真，可跟她玩到夠：「我仲會睇卡通片同去啲樂園玩，鍾意玩掟銀仔嗰啲遊戲，同啲小朋友鬥多飛！哈哈！」至於其餘的擇偶條件，她表示是誠實、孝順及善於理財，因此不需要男友陪她逛名店：「如果成日送貴手袋畀我，即係亂Fing錢啦！」