倉田保昭311啟發來港授武

曾與周潤發、成龍及李小龍等合作的日籍武打影星倉田保昭，受日本311地震影響，決定改變奢華生活，冒蝕錢之危來港開武館發揚武術精神，不言休的他更直言：「拍戲拍到死都滿足！」

倉田保昭從影多年，先後參演多部電影如《東方禿鷹》、《夏日福星》、《富貴列車》、《最佳拍檔》及《新宿事件》等，合作紅星多不勝數，如李連杰、周潤發、譚詠麟、元奎、趙薇、任達華及許冠傑等，與李小龍、成龍及洪金寶等亦更是私交甚篤。

談及今次來港教武術，倉田不諱言是受311大地震啟發：「當時拍緊戲，後來發現天災後遺症愈嚟愈大，覺得做人都係簡單啲好，最緊要係發揮到武術精神。以前鍾意名車，依家發現其實坐喺車裏面，再靚嘅外殼自己都睇唔到啦！」由於租金貴，他已預計武館會蝕錢，但仍然「一意孤行」圓夢。

說得一口流利廣東話的倉田，早已視香港為第二個家，更鍾情本地美食，加上女兒已居港多年，他一度考慮「移民」團聚，但有感於東京家中尚有飼養愛犬，惟有改為日、港兩邊飛。

大讚發哥謙厚有禮

以往與不少巨星於戲中比併功夫，倉田試過與成龍因對打節拍不對眼，一個鏡頭拍足六十多次，但談到最難忘的，不得不提遭莫文蔚「盲拳打死老師傅」，他說：「同佢拍《夕陽天使》時對打，一時不慎打中佢，佢痛到喊咗出嚟，但換轉佢出盡力打我，佢更加唔識借位，結果十居其九都敲中我，我真係痛得要命，但冇辦法，哈哈！」他大讚周潤發待人謙厚，合作過後彼此重遇，對方仍於人前人後介紹他為「前輩」，相當有禮。