梁炳情緒突變 慘做「負」心漢

梁漢文踏入樂壇二十年，經歷多次起跌，曾因這股無形壓力，令情緒出現問題，思想變得負面，幸懂得自我檢討，成功自救找回人生目標。

人生有幾多個十年，梁漢文（梁炳）慨嘆時光飛逝，回想最初17歲參加新秀歌唱比賽即不禁說：「由一個死o靚仔，到依家成家立室，係有好多回憶片段。」在樂壇打滾二十年，他承認當歌手有股無形壓力，更自爆在婚前兩年，情緒曾出現問題：「平時我好鍾意見朋友，但嗰段時間突然間變得收埋自己，最好嘅朋友都唔想見！諗嘅嘢都好負面，我開始知自己有問題。」幸好他自覺本身有優點，懂得檢討及調校，成功走回正確方向。

絞盡腦汁救樂壇

喜愛唱歌的梁炳認為做歌手，每年最少要有一首代表作，作為維繫歌手的生存價值。雖然近年廣東歌巿場被指不濟，但他從沒想過放棄，梁炳說：「大家有冇諗清楚，係咪做得唔夠人哋好？我堅持繼續出廣東碟有我嘅原因，每次都花盡腦汁去諗！你問我點解要咁辛苦？如果個個都唔去諗、唔去做，香港樂壇就真係冇o架喇！」

將於明年一月在紅館舉行20周年演唱會的梁炳，拍攝宣傳海報時「爆衫」展露腹肌，對此他笑說：「都幾Wild（狂野）！我希望今次畀大家唔同印象。（邀請嘉賓？）未諗！如果我請我要大家估唔到，出來效果係爆到七彩嘅！」提到今次個唱，他笑言抱着興奮與緊張的心情去做：「我哋都算身經百戰，之前同楊千嬅、陳奕迅做華星三寶個騷，出台前我同千嬅好緊張，好難得做咗咁多年，依然個心仲跳得咁快，今次演唱會都係，我已經開始緊張啦！」