Kelly飛來「驗」福：睇晒啦！

陳慧琳（Kelly）和古天樂等昨日拍攝電影《八星抱喜》，古仔在片中「上下冇着」，Kelly笑言大飽眼福：「睇晒啦！」她並用筆篤過古仔的肌肉。

甄子丹、吳君如、Kelly、古仔、熊黛林和杜汶澤等昨日到西環拍攝電影《八星抱喜》。阿澤的造型似足君如老公陳可辛，君如不禁與他合照。古仔戴爆炸頭假髮，以片中地盤工人造型亮相。戲內找古仔任模特兒的Kelly，笑言大飽眼福：「睇晒啦！佢第一日已經冇着上身衫，第二日連褲都冇着。（佢身形好？）我驗過，搵支筆篤過佢啲肌肉，覺得佢都幾勤力！」

但古仔卻感尷尬，因他要穿上泰山裝「飛來飛去」，又有一場參選港男的戲份：「唔知（着咩）呀！最多咪T-back，但未着過！」

子丹累君如睇醫生

君如大晒事業線，飾演賣樣賣身材的年輕偶像，與扮Rock Star的子丹是一對，兩人互笠高帽。君如透露他倆玩印度舞，累她因腰骨問題睇足兩星期醫生：「佢黐線㗎！第一日排舞就自己喺度轉！」子丹則說：「佢拍到面都青埋！」談到子丹的造型狂野，君如笑言拍攝時當正自己是周慧敏：「我一路同自己講，我好斯文、有身材、好瘦。（學唔學到？）梗係學唔到啦！佢咁瘦，我搞咗成朝先搞成咁o架！」

對於許冠英逝世，圈中人感到十分可惜。曾與他拍戲的君如說：「佢係好好人、好好演員，好突出自己Character嘅人，永遠喺佢隔籬啲磁場會好開心，希望佢家人節哀。」古仔則表示拍攝《鬼馬狂想曲》前，曾參考《殭屍先生》。此外，子丹收工後，傍晚時分與太太汪詩詩睇愛女在亮燈活動唱聖詩。