諸葛介意下下講法拉：有咩咁好比?

無綫花旦陳法拉及模特兒諸葛紫岐分別情歸Neway太子爺薛世恒及薛嘉麟，這對「妯娌」是非多多，包括靈堂爭寵、爆秘婚等，諸葛承認曾為是非嬲到喊，指兩人沒甚麼好比較！

口述：諸葛紫岐　筆錄：名人組

呢幾年喺香港發展令我改變好多，知道要惜福，因為自細冇試過捱窮，加上父母好呵護我，所以冇乜挫折，我覺得呢個世界好簡單，自然講嘢會好直接。直至入行後，真係覺得說話要好謹慎，因為片言隻字，就會被無限放大，引起好多是非！

如果問其中一個挫折係咪傳我同陳法拉不和，我承認呢啲亂寫嘅是非，令我唔開心！當日係記者問：「法拉係咪訂咗婚？」我話唔知，如果係就恭喜佢，之後又傳法拉喺美國秘密結婚，我話：「問番佢啦，如果係就祝福佢。」就係咁簡單，我咩都冇講，記者叫我祝福咪祝福囉！我都話唔知道係咪有咁嘅事，況且每個人都會想個個幸福快樂開心o架啦！唔通話唔祝福？但係之後就話我爆佢結婚或者其他嘢，記者有拍片，有片為證，我根本冇做過，無端端畀人屈，真係好唔開心，嬲到喊！

未來奶奶撐腰

唔明點解要寫同佢不和，成日將我哋比較，我哋各有各發展，佢拍劇、我做Model，路線又唔同，有咩咁好比？連男友同佢哥哥都拉埋落水，點解要咁？個個都叫我睇開啲，話傳媒鍾意寫兩個女人不和、恩怨情仇好似電視劇咁，個故事先至夠好睇夠吸引，但係要屈我而配合劇情發展，對我好唔公平！

同法拉冇為呢啲事傾過，我同其他觀眾一樣，覺得佢係勤力、拍好多劇嘅靚女，如果問有冇影響友誼，其實大家唔係好熟嘅朋友，同埋做呢行，明白唔需要為呢啲去傾。全家知道咩事就夠，尤其男友媽咪知我畀人屈好慘，但我可以點？（全文完）

後記：天真小公主

諸葛出道不久即被冠以「公主」之名，起初以為她與一般港女無異，認識後始知她的公主性格就是一顆赤子心。諸葛很真，不矯揉造作，有如愛笑樂觀的大細路。當知道朋友有煩惱，她會義字當頭盡力開解，而且轉數快，舉一反三。她還親自布置新居，不假手於人，相比一般撒嬌嚷着要男友幫手的港女，就知道要成為薛嘉麟背後的女人，聰穎自強的諸葛的確能勝任。