李治廷涉醉駕被捕

黎明愛將李治廷前晚演出後返家再駕車外出，期間被警方路障截停，「吹波波」後發現酒精含量超標，因涉醉駕被捕。

李治廷（Aarif）前晚演出一個洋酒贊助的音樂會，台前、台後也提供酒精飲品讓歌手及嘉賓任飲，自彈自唱的他獻唱新歌《Still》時，笑問觀眾有否水及酒飲！完騷後，他在後台吹水片刻，便乘坐保母車離開。據知，他返家後再駕駛「老婆」外出，途中遇上警方設置的路障，被截停兼當場「吹波波」，結果發現體內酒精含量超標，因涉醉駕被帶返警署調查，其後獲准保釋。

高層撐唔煙唔酒

記者致電Amusic高層王凱文了解，他說：「係有咁嘅事，佢完騷後坐保母車返屋企，之後詳情就唔知。」他以「唔煙唔酒」形容Aarif，但問到知否Aarif在後台有否飲酒，他說：「演出前一定唔會飲，唔知完騷後有冇因為開心而同工作人員飲幾啖慶祝。」至於身在紐約的黎明，據知還未知道愛將出事。而同場演出的Mr.則表示，在後台不見Aarif飲酒：「唔清楚事件唔作回應，我哋飲咗酒唔會揸車。」

任達華促道歉

至於在電影《歲月神偷》中演Aarif父親的任達華，認為Aarif應對公眾道歉：「飲酒揸車對司機同途人都好危險，希望佢出嚟向公眾道歉，承認自己做錯！」任達華希望外界原諒他，但無意致電了解：「以後飲咗酒咪搭的士或者叫公司車佢囉！唔好要啲交通警咁辛苦！」

李治廷Profile

年　　齡：24歲

學　　歷：英國倫敦帝國學院物理系

入行經過：17歲自彈自唱時被唱片公司高層發掘，簽約黎明的Amusic旗下，其後包辦衞蘭英文專輯《Morning》所有曲詞

獎　　項：憑首部電影《歲月神偷》在《第29屆香港電影金像獎》當選最佳新演員，並憑主題曲《歲月輕狂》捧走同屆的最佳電影歌曲獎，09年在《IFPI唱片獎》當選最暢銷本地男新人