陳豪謝天華 為掘金「棄獎」

每年花旦小生爭視帝、視后爭崩頭，昨午舉行的公布提名記者會卻人丁單薄，只得胡杏兒及陳法拉撐場，五大熱門視帝全冇影，原來個個寧願接騷拍戲，寧願放棄拉票搶獎機會！

娛樂圈每逢年底，歌、視兩界接住派成績表，視帝、視后更是每個小生花旦虎視眈眈的「寶物」！觀乎過往得獎者，個個「受勳」後均聲價十倍，難怪每年都戰況激烈！不過，昨午舉行的《萬千星輝頒獎典禮2011》公布提名名單記者會，多名賽前大熱齊齊冇影，候選視帝僅吳卓羲及馬國明出席，只有靠候選視后胡杏兒、陳法拉、汪明荃與江美儀撐場。

杏兒唔放法拉在眼內

五位頂頭大熱視帝包括謝天華、黎耀祥、陳豪、林峯及鄭嘉穎，原來均有「公事」在身，非出騷便拍戲，明顯搵銀緊要過爭獎！據悉，昨日出席品牌活動的鄭嘉穎出騷價達八萬元，出席亮燈儀式的陳豪及林峯出騷價更高達十萬元，林峯騷後即趕返內地拍新片。至於正於雲頂表演的黎耀祥，出埠登台價達二十萬元，而正忙於拍電影《Laughing Gor之潛罪犯》的謝天華，片酬亦高達八十萬元！價錢如此「和味」，難怪甘願放棄拉票良機。無綫今次肯乖乖放人，相信因大部分均是「親生仔」，可從中抽佣獲利，所以搞到記者會要靠實力派演員撐場亦在所不計。

記者會上，胡杏兒以高考來比喻心情：「仲考緊但有信心！個角色要慢慢睇，希望觀眾認同。（同法拉不和？）年年都有呢啲報道。（視佢為假想敵？）最大敵人係自己，唔係十拿九穩。」問到睇好男友黃宗澤還是拍檔鄭嘉穎奪視帝，她說：「兩個都支持！（想同黃宗澤一齊攞？）要睇天時地利人和，可能我遲啲仲有得攞呢！」陳法拉提到與杏兒傳不和，她表示最初有不開心：「個個寫到我係奸妃，後來諗諗吓覺得自己咁有談論價值，就冇咁唔開心！」

至於謝天華昨日偕吳鎮宇、徐子珊及黃宗澤等在到屯門拍攝《Laughing》片，他更以監犯造型示人。首度與鎮宇合作的子珊則讚對方是好老師，還自爆於戲中會有親熱戲。昨晚到尖沙咀出席亮燈活動的陳豪，被問到為何缺席，他只解釋因有事在身，談及奪獎亦信心不大：「我睇好鄭嘉穎，因為角色同真人差距大。（女友陳茵媺提名女配角？）一定力撐！（真係得獎就上台送吻？）到時先算。」