諸葛認豪慣：搵埋唔夠畀

初入行的諸葛紫岐不知世界艱難，賺一千卻請月薪一萬元的助手。捱過跌過，兩年前才停止接受母親的經濟援助。

爸爸做電子同房地產生意，媽咪係政府官員，係爺爺話我知我係諸葛亮嘅第63代後人，媽咪仲要跟習俗返山東諸葛村生我，有認祖歸宗嘅意思。後來因為移民加拿大，所以我對家鄉嘅記憶好模糊，只記得有座掛咗諸葛亮畫像嘅祠堂，爺爺都有同我講《三國演義》內容嘅真假，佢話空城計其實係趙雲做。

父母反對入行

雖然移居加拿大，但係爸爸冇忘根，屋企有成千本書。佢自細培養我習字，希望從中培養心境平和同集中，我諗我遺傳到諸葛亮嘅小聰明，所以學嘢好快！報道話我冒認係諸葛亮後人，我真係有諗過出律師信去告佢！你可以話我個人唔好，但祖宗同家族唔可以講笑，因為唔係話我一個，係話緊我成個家族，同埋點解我要冒認？

父母初時好反對我入行，尤其見到話我公主病或冒認諸葛亮後人嘅報道，仲嬲到叫我唔好做！佢哋認為女仔應該留喺屋企，或者正經打份工，唔好成日曝光，做呢行都只係睇個樣，咩都學唔到，冇將來。不過我要求佢哋畀我試，仲應承媽咪唔接泳衣同內衣騷，其實媽咪想我連低胸都唔好，最好全程着樽領，唔好畀人見到事業線！佢哋畀我做到今日，係媽咪見我入行後有好大進步，包括準時、更有責任心同埋識慳。我以前冇金錢觀念，見嘢就買，買完又唔記得買咗，可以重複買同款同色嘅衫！

肚餓淚灑異鄉

就算初入行時，我只係賺新人價，每個Model Job收880蚊都好，但都自己畀錢請月薪一萬蚊嘅助手跟我，真係搵埋都唔夠畀！所以當時去影相，工作人員會覺得奇怪同私下話我：「呢個Model咁新就咁巴閉要助手？」其實我唔係話要搞排場，只係我初來香港完全唔識路，所以要車同助手幫我。當時影相遇到奇怪甫士，我會好直接話唔靚唔影，搞到人哋好難做，仲覺得我好寸。

最記得初入行時，有一次要去台灣影相，因為唔包助手同食宿，仲諗住自己一個去，可以又玩又食。點知去到見酒店好差，加上自己唔識安排時間，未食飽就要開工，忍唔住喊話：「我唔影！未食嘢冇力！」嚇到個記者呆咗，最後惟有畀我去買個包！

諗番以前真係覺得自己唔成熟，可能係因為自小冇經過咩困難，個人太直接，依家識得去為人設想。依家明白賺錢好辛苦，珍惜依家擁有嘅嘢，呢兩年終於唔使問阿媽攞錢！

（明日待續）

口述：諸葛紫岐

筆錄：名人組