吳雨霏陳自瑤人生新一頁

女歌手吳雨霏（Kary）和無綫小花陳自瑤（YoYo），今年各自步入新階段，Kary轉投新唱片公司重新出發，她直言不想輸。YoYo則與王浩信拉埋天窗，全因信者得愛！一份新合約、一紙婚書，令她們展開人生新一頁！

身為「80後」歌手的吳雨霏（Kary），明年入行10周年，正所謂十年人事幾番新，過去她試過不同身份：以女子組合Cookies打響名堂、組成樂隊Ping Pung做Rock女，接着又以單飛姿態推出唱片，堪稱「百搭歌手」。今年Kary轉變更大，她毅然離開舊公司轉投環球唱片懷抱，與陳慧琳、謝安琪、陳奕迅及張敬軒做同事。年僅25歲她，經歷多番轉變，幸她適應力超強：「我都幾Proud Of（驕傲）呢樣嘢，覺得自己幾叻，過去同唔同嘅人合作，又試過喺紅館開騷，到依家轉新公司，仲係不停適應，如果適應能力差啲，我諗會Go Crazy，好彩我鍾意挑戰同試新嘢！」

有信心攞獎

由以往佻脫的少女，逐漸變成今天滲出女人味的歌手，Kary有感而發：「以前細路女扮大個，唱歌會聲嘶力竭，依家反而會淡淡然，變得更成熟。」難怪加盟新公司頭炮的專輯《我本人》，會以慢歌為主：「每首歌要做到好質素，之前唱咗唔少慘情歌，今次會唱番啲Sweet歌，好似《未晚》、《歸宿》等。」Kary表示已在新公司過了「試用期」，問到有否預料是非纏身，如被指爭寵和爭獎，她說：「我EQ幾高，呢啲是非就預咗，公司所有歌手我都尊重同欣賞。（爭獎？）有獎係Bonus，我對《我本人》有信心。」對於陳奕迅（Eason）曾喚她做「霏姐」，Kary絕不敢當：「霏妹咋！Eason份人好Caring（照顧），主動同我傾偈交流。」她直言現時感到壓力，但會當成推動力：「我唔想輸，公司有好多優秀歌手，今次順理成章可以合作。」由於四大與無綫的版稅風波仍未完全破冰，她仍未能在無綫亮相：「暫時仲係未嘅，所以要適應囉！」

Kary事業上重新出發，但感情卻交白卷，自從與網球王子洪立熙甩拖後，先後與紅髮型男及周柏豪鬧緋聞，惟她否認：「我同柏豪冇可能，同佢太Friend。（翻撻洪立熙？）唔會。（有冇人追求？）都有，但我好忙，都唔急。」

不排除閃婚

Kary還發表戀愛觀：「我發覺拍拖唔使太轟烈，簡單平凡最浪漫，有啲驚喜都OK。（揀圈中人？）揀圈外人好啲，但唔抹煞呢個可能性。（閃婚？）大個啲可能會嘅！」除緋聞外，近日Kary還捲入整容疑雲，她笑稱這幾個月的新聞，已是她去年的總和。

後記：姊妹情深

Kary在圈中人緣不俗，與昔日Cookies隊友鄧麗欣更情同姊妹，她表示平時與對方常有Girl's Talk：「同佢乜都傾一餐，我哋好好感情，經常聯絡。（同舊同事聯絡？）都有，大家問候吓。」

髮型：Heibie@Hair Culture

化妝：Cyrus@Beauty Tech

服裝：Runway Workshop

場地：SML

本周五（11日），陳自瑤（YoYo）將與拍拖三年的男友王浩信（Vincent）拉埋天窗，本月13日擺酒宴請親朋，步入人生新階段的YoYo，從「女友」身份升呢為「老婆」，她直言還未能適應，暫時仍難以想像成為人妻後的生活，她說：「啲人話結婚之後要叫我做『王太』，我話都係叫番我做『陳小姐』算喇！嗌乜太物太，嗌到我好老咁，其實我都仲係一個少女！」

拍拖時女仔可以刁蠻任性，成家立室後自然就多了一種負擔：「以前獨立啲，自己鍾意做乜就做乜，第時做乜都要同老公商量，萬事以家庭為重，我思想都幾傳統，結婚後要好好照顧老公，體諒佢多啲。」

婚紗款保密

拍過多個婚紗廣告的YoYo，並沒有因此而喪失對婚紗的憧憬，有別於一般女生追捧的「白雪公主」式誇張傘形婚紗，她挑選了收身、高貴及懷舊的款式，而且婚紗款式至今仍保持神秘，希望屆時令「老公」及賓客眼前一亮，她說：「以前影親婚紗相都係人哋幫我揀好晒，今次結婚終於可以自己話事，揀啲自己鍾意嘅元素，除咗我阿媽同幾個好姊妹睇過之外，就冇人睇過，要保持神秘感！」

恨生小朋友

婚後她希望到馬爾代夫度蜜月，奈何他們拍劇的期很難遷就：「結婚我已經請咗四日假，我完咗套劇又到Vincent要拍，惟有睇吓遲啲邊幾日唔使返工，就算今次去唔到，第時點都要去！」

宣布結婚後，YoYo常常被追問是否懷孕，她屢次否認，但卻恨有小朋友恨到出面，並勤飲中藥調理身體：「Vincent特別鍾意小朋友，拍拖嘅時候已經成日講，唔好太遲有小朋友，驚有代溝，要陪住佢哋成長，如果太老就未必夠精力陪佢哋跑！」不過俗語有云：「有仔趁嫩生。」YoYo亦深明此道，她希望將來可以生一仔一女，湊成個「好」字。

YoYo又表示婚後不會減產，亦不會享受過全職少奶奶的生活，怕跟社會脫節，但若生了小朋友之後，她會以子女為重：「佢哋啱啱出世後，頭幾年我一定會花多啲時間陪佢哋，間中可能做吓嘢！到佢哋再大個啲，我先再花多啲時間喺做嘢方面。」她亦不怕跟子女相處不來，因為始終有血緣關係，相信最後一切都會迎刃而解。

後記：美女廚神

YoYo曾被「老公仔」形容為家中的「起居飲食及管理大臣」，她直認不諱，雖然廚藝未可媲美五星級大廚，但「美女廚神」四字當之無愧：「你叫我煮九大簋就真係冇可能，但點都識煮番幾味家常便飯，再煲埋湯都唔成問題！」相信她的「老公仔」婚後可大飽「眼」福及「口」福！