超雲為賭王壽宴嗌頭痛

賭王何鴻燊90歲生日在即，各房花盡心思！向來慶祝賭王農曆生日的三房計劃於本月21日賀壽，前晚三房千金超雲透露壽宴因二房於前一天舉行生日派對，費煞思量！

前晚何超雲出席香港時裝設計師協會舉辦的《時裝．視野》開幕典禮，獲頒「最佳時裝視野獎」，其他得獎者包括周慧敏、梁漢文、何潤東、薛芷倫、何韻詩、黃偉文、黃宗澤、杜鵑及麥浚龍胞兄麥浚翹，名模陳嘉容則為時裝騷擔任模特兒。超雲坦言希望有機會跟男友陳山聰齊齊奪得該獎項，又稱有收看男友演出的新劇《萬凰之王》，並大讚：「做得幾好，有進步。」

等家姐回覆

將於本月25日新曆生日的賭王，各房慶祝活動已籌備得如火如荼，據悉三房依慣例於賭王農曆生日（即本月21日）慶祝；四房慶祝賭王新曆生日；二房則定於本月20日慶祝。問到籌備情況如何？超雲說：「有件事好頭痛，我哋三姊弟花咗大半年籌備爹哋嘅生日派對，計劃今個月21號喺四季酒店搞。不過，我日前睇報道先知道家姐會喺20號幫爹哋搞生日，我怕爹哋連續去兩日，身體會應付唔到。事後我打畀家姐商量，可能佢有少少忙，冇覆我，惟有等佢回覆。雖然爹哋身體好好，但呢個係我自己少少擔心，希望佢20號晚抖多啲，21號晚都可以，畢竟佢都90歲。」她稱已通知父親要連走兩場，賭王亦很雀躍：「佢好開心咁多人同佢慶祝。（擔唔擔心家姐唔覆？）唔會！佢只係太忙。（四房人20號一齊搞會好啲？）未知，暫時冇收到通知出席。（會唔會主動要求出席？）遲啲聯絡到家姐先。」另外，超雲前晚急不及待跟賭王、三太及山聰分享獲獎的喜悅，並將相片上載於微博。

而首度獲獎的周慧敏，自言勇於嘗試不同造型，還笑說：「相信大家最深刻係宮廷造型！但我就最鍾意《大時代》嘅慳妹。」