余曉彤缺陷美 崇尚無添加

拋胸、騷腿、四圍辣火頭，全是模出位的標準動作，但周秀娜師妹余曉彤（Hidy）捨棄這條上位方程式，堅持靠無添加Body在模界打滾，因這種堅持抗拒一切誘惑，令Hidy萌生一段純真的愛情，也許這就是她做人做事的完美方程式！

提到今年最出位o靚模，非何佩瑜（Jeana）、許穎（Phoebe）等人莫屬，無論身材或是非均充滿話題性，但今年同樣單飛出寫真的周秀娜師妹Hidy光芒則被兩人蓋過！對此，B Cup身材的Hidy坦言輸蝕︰「我會覺得輸身材，邊有佢哋咁勁，其實自己都鍾意睇咁豐滿嘅身材，視覺效果好，但近幾年實在太浮誇喇！望得多都覺得滯！」

論身材，Hidy自嘲上圍輸幾條街，但她不認同「大胸」能增加工作機會︰「身材冇咁勁，仲可以着多啲Fashion嘅衫，做更多模特兒嘅工作，Jeana身材係勁，但路線要好Sexy，形象冇咁百變。事業線有時我都有啦！戴Nube Bra都可以谷出嚟！如果男仔只係鍾意我身材，我唔會開心，呢啲男仔要唔要都罷！」

怕歪面唔打Botox

談論o靚模整容傳聞總是停不了，有人說「十個o靚模九個整容」，Hidy不願置評︰「我唔鍾意整容，個樣有缺陷先會令人記得我係余曉彤，雖然依家啲人整到個樣一模一樣，但唔關我事，條路係佢哋自己選擇嘅！」Hidy更指家人必定反對︰「我同屋企人好似樣，如果整咗實畀佢哋鬧死，但我冇整容呢個諗法，好滿足依家擁有嘅樣貌同身材，而且超級抗拒打Botox，見好多人打到歪面！」

Hidy之意不在整，在乎如何瘦身也，減肥是她最煩惱之事，她說︰「整容係長線投資，自己冇咁嘅錢去做，浪費金錢，有錢都走去買基金啦！而我最擔心唔係整容係減肥，因為我時肥時瘦，咁會影響到我嘅工作。」

與Jeana亦敵亦友

o靚模界如戰場，Hidy坦言與同門Jeana亦敵亦友，並佩服對方的大膽言行︰「Jeana好爆，敢言敢做，呢個係佢嘅特質，問心我做唔到，同佢嘅性格啱啱相反。」提及真正模界好友，便是其師姐周秀娜（Chrissie）︰「Chrissie係我同鄉，識咗好多年，4、5年前大家都係拍咗半年拖，一齊行騷嗰時會講大家嘅男朋友，佢男友（Avis）同我男友都成為好朋友，仲會一齊去玩。」

「越軌」後覓最愛

提到Hidy的潛水教練男友William，儘管早前傳出蔡依林緋聞男友錦榮介入，但兩人關係未因此出現裂縫，上月更在菲律賓潛水訂婚。提起「未婚夫」，Hidy甜在心頭︰「嗰刻好感動！大家之前經歷好多，真係講唔晒，其實兩個人相處真係講個信字，因為想像無限，如果大家冇空間、冇信任，一定會成日鬧交。」訂婚後，Hidy認為感覺未有太大分別，婚期則「未係時候」，只強調婚後不願做「黃面婆」。至於婚後會否努力造人？她反應甚大︰「嘩！多咗一個小生命，好似好遠咁！」

回憶與「未婚夫」5年的感情，當中有起有跌，兩人身邊不乏突如其來的桃花。對於「出軌」二字，Hidy笑說︰「哈哈！好尷尬！都試過有第三者出現，一段感情起跌梗係有局外人出現，因為唔開心嘅時候突然有人關心你，會覺得對方好好，心理上越軌，但坦白講你要錯過先知邊個先係最愛。」未知是否經歷多了，人也長大了，Hidy比之前樂觀︰「如果男友身邊有女仔獻殷勤，梗係會呷醋啦！但我又會諗都係男友條件好先有女埋身啫！如果佢鍾意你，無論點都會揀你。」

放棄當差賺「快錢」

出身於警察世家，Hidy家人大部分當差，自然家人都想她成為除暴安良的一分子，但她偏偏當上o靚模︰「我讀書嗰陣做兼職模特兒，本來畢業係去考警察，入學堂之前決定放棄，選擇入行做Model，因為我唔想做一世警察，而且覺得做兼職模特兒已經搵錢好易。」

沒有走進學堂，家人難免有微言，但一份堅持打動了父母，她說︰「屋企人有唔開心，唔明點解我走去呢個花花世界，但我向佢哋保證只係做Job，我唔會迷失，可能因為呢種堅持態度，佢哋之後都好支持我，而我揀呢條路冇後悔，因為真係學到好多嘢！」

謝絕飯局

o靚模經常被傳出席飯局及問價等負面新聞，當日小記亦單刀直入向Hidy問個明白，她說︰「其實有收過類似嘅訊息，叫我去唱K、食飯，仲有錢收，嗰時已經諗到係咩一回事。但我好怕醜唔識應酬，冇應約，不過身邊有人有咁做過，呢個世界咁多誘惑，而且呢啲係人哋嘅選擇！」