梁思浩為鍾保羅 隔世追兇

梁思浩因主持靈異節目而遇過不少怪事，但他以「生命中最震撼的兩件恐怖事件」來形容以下的兩段觀眾爆料，分別與已故的無綫藝員鍾保羅及翁美玲有關！至於最近踩過界主持靈異節目的譚凱琪（Zoie），本身亦曾兩度遇上靈異事件，但她的後知後覺更詭異！

性格「易話為」的譚凱琪（Zoie），想不到遇上靈異事件時一樣「易話為」，曾在家鄉大宅及日本酒店遇上靈異事件的她，每次都是慢半拍才知驚，比鬼怪更搞鬼！第一次遇上的家鄉大宅靈異事件，當時只有6歲的Zoie，與家人一起返內地鄉下祖屋度假。Zoie記憶中，祖屋很大很空曠兼很冷，還有一陣陣燒柴的味道，縱然感覺古怪，但她竟極力爭取要自己一間房，靈異事件就發生在首晚：「我半夜醒咗，見到道牆突然打晒光，然後有個好似留咗好長頭髮嘅影，拎住隻扁梳係咁梳……嗰下可能我太眼瞓，我冇擰番出去望係邊個，只係奇怪邊個半夜走入我間房？」翌日她問媽媽是否有頭髮很長的親友？母親否認後，Zoie才知驚，之後不敢再自己一個睡！

「冇聲電視」傳經文

第二次是Zoie到日本公幹，雖然下榻的酒店潔淨明亮，一點「污糟」的感覺也沒有，不過習慣開「冇聲電視」睡覺的Zoie，睡至矇矓之際還是遇上靈異事件：「半夜電視突然傳嚟有人用廣東話讀聖經嘅聲音，約翰福音幾章幾節咁，嗰刻因為眼瞓，我冇乜點為意！之後第二朝瞓醒我先覺得奇怪，明明個電視校咗冇聲，點解仲會聽到經文？」她更指當時電視畫面全白色，夾雜着用黑色毛筆字寫的經文，單聽也讓人毛骨悚然！

人肉 Morning Call

談到個人膽量，Zoie謙稱中規中矩，雖然小時候曾被盛傳鬧鬼的鐵路廣告嚇至失眠數周，但長大後都會與友人講鬼古或交換可怕靈異經驗，其中一名友人發生在東南亞酒店的鬼古，更令她嘖嘖稱奇：「間酒店前身係郵局，我朋友有朝畀個好奇怪嘅Morning Call嘈醒，有個着住郵差制服嘅人，拎住佢個名牌，係咁搖個鈴鈴叫佢起身，我朋友當時因為太眼瞓打發咗嗰個人走。之後，佢周圍問啲工作人員點解個Morning Call咁奇怪，啲人都表現得隱隱晦晦咁，猛話搞錯，仲話送番Coupon畀佢致歉添！你話幾驚！」

梁思浩講起當日的奇異經歷，至今仍猶有餘悸，事緣自早年主持有線《怪談》時，接獲一個觀眾來電！當時一名小學教師致電求助，自稱因租住了於1989年逝世的前無綫金牌節目主持人鍾保羅的沙田第一城故居，並多晚在電視中看到對方透過螢光幕對着自己說：「你幫吓我得唔得？」令思浩毛骨悚然，因為他驚訝該名教師可以在多個晚上，透過電視畫面與鍾對話，鍾更向教師講述自己如何跳樓自殺……

貪平租故居

思浩娓娓道來：「個教師貪平租咗原值4千幾，但只需2千蚊嘅單位，經紀都解釋過嗰度有人死咗，但佢話唔驚！直至一晚放學返屋企開電視，見重播好舊年代嘅『港姐』，仲見到做司儀嘅鍾保羅，心諗佢死咗喎！後來有啲唔妥索性閂機，隔咗幾晚冇件事又再開電視，都係一樣播『港姐』就開始驚……畫面內鍾保羅個頭竟然轉過嚟向住個教師講：『你幫吓我得唔得？』、『我畀人害……』、『你幫我報警！』教師震撼到衝埋去閂電視，後來愈諗愈亂，可能亂咗幾晚又冇嘢，仲同鍾傾偈，後來想幫人做件好事，咪去咗就近警署報警，可惜警方冇受理，仲畀人當係傻！」

兩打齋超度

思浩憶述此事仍心驚驚，但因該教師無法釋懷而想盡辦法去幫手「尋人」，但法律上最後甚麼也做不到，思浩只好借電視台財力再用教師名義，為鍾保羅打了兩堂齋作為超度，一共花去4萬多元：「個教師前後住喺嗰個單位都有4年，走前仲同鍾保羅講：『我要做都做晒，睇吓第二個幫唔幫到你啦！冤有頭、債有主！』我聽落都心寒！」