徐子淇總指揮小俊熹跳火圈

「千億新抱」徐子淇昨日為兒子李俊熹舉行迎新宴，大方分享一家五口的幸福私相簿及兒子的馬戲造型照，溫馨滿瀉。

今年六月，徐子淇為丈夫李家誠（Martin）誕下兒子小俊熹（Triston），昨午假君悅酒店為兒子舉行迎新宴，以馬戲團為主題，並命名「Triston's Circus」。席上，子淇將生活照製成錄像播放，除有兒子的可愛相片外，還有「全家福」及老爺李兆基（四叔）弄孫為樂的溫馨照，幸福滿瀉。

期間，子淇以「馬戲團女王」造型跟Martin接受傳媒訪問。身穿超低胸羽毛裙晒收身成果的她表示邀請二百名朋友參加，但四叔及親戚均不會出席：「因為之前已經同親戚食咗飯。」問到Martin兄長李家傑的三胞胎會否現身？Martin即代答：「今日冇預佢哋，因為有太多記者。」

投訴仔女似晒老公

提到馬戲團主題，子淇稱自小已夢想成為空中飛人，還花盡心思為小朋友打扮：「有套西裝畀囝囝着，仲預多咗套大象衫，睇吓佢會唔會扭計，唔扭計就畀佢着。囡囡就同我差唔多，都係羽毛裙。（囡囡有冇你咁性感？）佢哋都係吊帶裙，我頭先黐膠紙（防走光）嗰陣，佢哋仲問我做乜！」她還透露現場有不少表演如空中飛人及噴火環節等，還將小俊熹化身馬戲團藝人：「有啲相係囝囝扮空中飛人、扮大隻佬同扮獅子跳火圈。」記者指與女兒的百日宴相比，小俊熹的迎新宴似乎較低調，但子淇不認同：「次次都差唔多，只係想畀朋友見吓BB。」問到收到甚麼禮物？子淇表示已呼籲朋友捐錢代替禮物，並成立慈善基金幫助香港小朋友。

Martin則透露與四叔送玩具給小俊熹，又寄語兒子：「希望佢將來好成功，對社會有貢獻，做個好心地嘅人。（子淇話休息吓唔生住﹖）抖吓先！要畀啲時間湊小朋友。（你係咪負責玩﹖）玩都唔易。」子淇隨即幫口：「玩都辛苦，一邊要孭，一邊要騎膊馬，一邊拉住隻腳！」問到小俊熹像誰時？子淇笑着投訴：「似佢多啲，三個都似佢好唔公平！我期望個仔似我，但都係似佢，佢嘅基因好犀利。」每位嘉賓均收到一份馬戲團帳幕造型的回禮禮物，內有潤膚露及糖果。