李彩華朱茵 北．歸路

不要說甚麼歸屬感，錢就是王道，人仔多麼好賺，難怪香港演員紛紛掏出回鄉卡北上發展。朱茵和李彩華早成北伐先鋒，巾幗不讓鬚眉，一賺便是十倍人工，但人在異鄉，多多錢也解決不了淡淡滲出的鄉愁，這就是等價交易……

五年前已經北上發展的李彩華（Rain），近年已成為內地搶手女星之一。她透露在內地拍劇的酬勞，由以往的幾萬元人民幣一集，已暴升至現時的20萬元人民幣一集：「係天意安排，之前冇諗過北上發展，但之後有機會就試吓拍，原來真係比香港好搵好多。」Rain表示劇集《回家的誘惑》是她今年代表作，令人氣及收入急升：「套劇喺內地破咗好多紀錄，本身冇諗過咁勁，雖然劇中角色唔算討好，點知又好受歡迎，仲掀起追劇熱潮。」

片酬暴漲廿萬一集

一度迷失的Rain坦言今次爭番啖氣：「絕對有種吐氣揚眉感覺。（氣餒過？）試過好迷失，之前同經理人發生問題，心灰意冷，有諗過不如算數唔好做，疊埋心水嫁人，但嗰時又搵唔到另一半。不過天無絕人之路，自從冇簽經理人後，反而少咗負擔，自己去同人傾合作，依家一劇接一劇，先後拍咗《錯嫁》、《獨立縱隊》同《寶貝計劃》，全部排住隊出年播。」

問到在內地拍劇有否遭受白眼？她說：「冇喎！反而以前喺香港拍劇就有，有次拍劇去試鞋，我同工作人員講對鞋唔啱着，佢話：『唔啱着呀？冇其他喎！』但另一個演員話對鞋唔啱着，工作人員即刻摷埋其他鞋畀對方試。（內地？）大家互相尊重，拍得開心。」談到電視花旦小生北上賺錢，Rain說：「好正常吖！觀眾鍾意嘅嘢唔同咗，上一代嘅劇集好睇好多，劇本有深度。（返港拍劇？）早幾年拍完無綫《下一站彩虹》同亞視《火蝴蝶》後，都有一段時間冇拍香港劇集，加上太耐冇講廣東話，怕適應唔到。有好劇本同有充裕休息時間都冇問題，酬勞亦可斟酌。」

為事業打拚唔趕嫁

Rain曾在電影《單身部落》有大膽演出，問到會否再接拍這類電影？她笑說：「唔得！（錫身？）只係愈大個愈怕醜，拍Kiss戲都會尷尬。」除拍劇外，廣告酬勞亦令她收入激增：「拍咗好多護膚品廣告，（每個廣告7位數字？）係呀！（千萬富婆？）OK啦！」事業愛情兩得意的Rain，與男友潘啟翀打得火熱，男友不時飛往內地探望她。問到是否賺夠錢便嫁人？她說：「仲有排，我未到30歲，以前有結婚衝動，但依家仲想拍多啲劇。（男友詐型？）佢好贊成我工作，各自為自己事業打拚。（遙距戀愛？）一半啦！我哋用Whatsapp溝通，互相信任。」

後記：思鄉情切

Rain近年雖在內地工作，但偶爾會思鄉病發，惦掛香港，她說：「都掛住香港，好彩媽咪喺內地陪我，感覺冇咁疏離。（對香港有冇歸屬感？）絕對有，我恨返嚟o架！」

若說藝人北上賺人仔是潮流，那麼朱茵早已是北伐的「Hold住姐」，在內地導演和監製的用人名單中打上星星。有傳朱茵內地拍劇25萬人仔一集，她一語道破北上發展的誘因：「就係錢！只要一有機遇，真係唔好放過，因為內地拍劇、拍戲嘅酬勞係用十倍、廿倍計！內地公司畀得起錢原因好簡單，神州大地咁多個省，佢哋一套電視劇係幾十個乜乜衞視一齊買，片商知道有大回報，一定會推高演員酬勞。愈來愈多演員、導演北上為乜？錢係一個重要因素！」

民族DNA使然下，中國人喜歡臨時變卦，始終香港做過殖民地，相對神州的製作變陣功力，朱茵明白甚麼叫橘越淮而枳，原來北上是要甘心承受波譎雲詭的變化：「內地拍咁多劇，如果唔喺上海、北京呢啲文明地方真係參透唔到佢哋嘅工作模式。喺偏遠地方可能文風唔同，好多製片係農民出身，又唔係兼讀電影出身，好容易出現摩擦！」

恨返香港拍代表作

這個例子令朱茵暴跳如雷，彷彿努力被硬生生閹割，令她想念香港的一切：「好耐之前接過一部戲，所有Shot拍完諗住收工，但唔知導演定片商出現問題，劇組要我飛返去從頭拍過，對演員嚟講係嚴重打擊，我花好多心機落個角色度，最離奇係返到去啲演員唔同晒，唉！奇哉怪也！」文化差異加上淡淡鄉愁，朱茵很想這個家，在這個成名地拍一套代表作：「唔知點解，TVB同王維基都冇搵過我。我好想返香港拍劇，就係歸屬感，我想呢個地方而唔係為錢。如果為錢，我唔會幫電台拍嘢！只要劇本好，我隨時Ready！」

提名艾美獎急報喜

萬事俱備，只欠一Call，如今朱茵的CV再鑲上金邊，莫論艾美獎可否凱旋而歸，她已躋身提名名單：「吐氣揚眉！我一路畀人感覺以靚行先，但大家忘記我係演藝學院畢業，朱茵都係實力派，哈哈！大家都知我冇大財閥同大公司支持，只得我同經理人相依為命。今次有份提名，係好大鼓舞，我知道後立即打畀Paul（黃貫中）報喜！」很多人關心朱茵得獎後會否下嫁Paul，談到這關節眼，她說：「唔知點答，總之我哋已有共識，唔係好想走呢一步，因為大家都係工作狂，好享受拍拖，唔想結婚生仔後令依家生活變質。我只可以講，如果要生小朋友，就一定會結婚先，真係結婚就一定要靚，我都想着件靚婚紗，做個靚新娘！」Paul，你聽到未？

後記：親和暖心

朱茵的親和力逼人，如秋天的陽光，從她身上呷到秋甜，平易近人和暖入心。去年同一天跟她做訪問，一樣場景一樣的人，她笑說：「咁啱嘅？又係你呀？」這就是歸屬感。