李玟忍淚冧Bruce首唱愛的婚曲

國際級華人天后李玟（CoCo）與利豐集團執行總裁Bruce Rockowitz的世紀婚禮昨晚進入Part 2，由全港最高建築物ICC的Sky100移師邵氏影城舉行，婚宴場地花了7日時間以千萬元打造，在這個夢幻舞台中，CoCo明言考慮生BB：「連Bruce兩個女都有問我！」

這個被喻為香港開埠以來最豪華的婚禮，新郎哥Bruce為CoCo準備連串驚喜，繼前晚在全港最高建築物ICC的Sky100舉行註冊儀式及派對後，夢幻婚禮昨晚踏入Part 2，並移師邵氏影城舉行。Bruce豪花千萬元，動用450人花7日時間把邵氏影城打造成夢幻舞台，讓飲譽國際樂壇的CoCo在台上唱出愛的心聲！

繼女催生BB

昨晚8時，一對新人乘坐銀色勞斯萊斯現身，受訪期間親密攬腰及十指緊扣，恩愛滿瀉！CoCo穿上何國鉦設計、釘上千顆水晶的中國式長裙，身材玲瓏浮凸！對於被姊姊李思林（Nancy）踢爆緊張失眠，CoCo說：「冇呀！好開心，我等陣會首次獻唱我寫嘅《I just wanna marry u》，真係驚自己會喊，因為首歌意義好大，係為呢個婚禮而作，講我同Bruce嘅甜蜜故事，之前都有唱過畀佢聽，佢話係最好聽嘅歌！」在旁的Bruce即冧爆地說：「我急不及待想聽！」記者提議他合唱，他笑說：「同佢唱會顯得我唱得好恐怖！」

儘管Bruce與前妻育有兩名女兒，但CoCo仍想為老公繼後香燈。問到會否生BB，CoCo甜笑說：「考慮緊，唔心急，但Bruce兩個女都有問我呢個問題。我好鍾意工作，因為我屬於舞台。」問到Bruce送了甚麼給太太，CoCo再跟老公打情罵俏：「唔使啦！送咗個咁嘅婚禮畀我！」Bruce即插嘴說：「陸續有嚟！」對於整個婚禮被指豪花1.5億元，CoCo迴避地說：「唔講錢喇！最緊要開心，個婚禮用咗1年籌備。」此外，Bruce表示過幾天生日，而婚禮是他最好的生日禮物，他又表示未決定蜜月地點，但據知二人將到菲律賓天堂島度蜜月。

姊姊踢爆失眠

至於CoCo的姊姊Nancy則穿上低胸短裙受訪，談及妹妹出閣，她表示相當開心，並踢爆CoCo前晚慶祝後失眠：「為咗今晚個Party，佢早上8點已經入場打點，因為要趕住出門，所以我只為佢化咗一半妝就要走！」此外，昨晚的婚宴官商雲集，出席嘉賓多達400人，包括盛智文夫婦，Top Shop老闆Sir Philip Green夫婦、Tommy Hilfiger夫婦、楊其龍、王敏德夫婦、雷禮權夫婦及貝安琪等，星光熠熠！