基仔為未來基嫂設計嫁衣

古巨基昨日舉行新碟祝捷會時，承諾結婚必定公諸於世，更預告會為新娘設計婚紗，相信女友Lorraine必定甜到漏！

基仔新碟衝破雙白金銷量，昨日舉行祝捷會，最近是非多多的無綫高層樂易玲與音樂總監鄧智偉亦有到場支持。剛出席完韓國音樂節的基仔，轉頭到內地開騷賺人仔，記者笑問是否搵老婆本？他說：「唔做呢單都夠！（有傳Lorraine同你04年喺斐濟群島秘婚，佢密密投資，依家你身家逾億？）我冇計過有幾多！（夠老婆本？）吓，要1億咩？身邊冇投資叻嘅朋友，工作上佢一直都係好幫手呀！」

問到是否滿意這位賢內助？基仔說：「各方面都係好幫手！」不過他詐傻自嘲中文差，以為賢內助等於好幫手，認真搞笑！不過，他承諾結婚一定公告天下：「未必大排筵席，鍾意簡單啲！（同Lorraine傾咗？）未呀！（為另一半設計婚戒？）戒指咁簡單？將來我嘅新娘一定係着住我設計嘅婚紗！」

勸年輕人自愛

對於曾擔任其個唱嘉賓的胸模Jessica C.近日流出疑似慾照，基仔說：「戥佢好慘，女仔畀人咁出賣，希望佢快啲喺傷口中痊愈！我想呼籲年輕人避免拍呢類相，相愛都應該適當保護自己，我影過最親密都係搭膊頭、面貼面！（同粉絲影相都搭膊啦！）用力同唔用力嘛！大力到唧晒啲手汗出嚟！」