李彩華拖實男友睇場

近年密密在內地拍劇的李彩華（Rain），最近與金融才俊潘啟翀（Derek）傳好事近，有意於「六條一」拉埋天窗。日前Rain秘密返港，男友專程接機，其後她偕男友到灣仔「睇場」。

現年27歲的Rain，去年6月跟拍拖兩年的保險界才俊王傲山分手，情路幾經波折，終於今年3月秘密與35歲、從事金融業、家底豐厚的Derek撻着，二人相戀7個月已打得火熱，不時孖住夜蒲。由於Rain近年長駐內地拍劇，與男友只靠電話及微博維繫戀情，但已達見家長階段，最近有指他倆好事近，有意於11年11月11日擺酒結婚。

Rain日前由內地返港，Derek提早到機場接機，Rain甫步出，Derek連忙上前為女友推行李，然後十指緊扣往停車場取車，並送女友返香閨。晚上七時半，Rain換上另一套衫，偕男友到灣仔區一間名人食府「視察」場地。二人向食店職員詢問一番後步出，手牽手在門外商量，似是未找到合適場地。未幾Derek截了一部的士與Rain離去。

密密搵人仔

事後記者致電Rain，原來她已返回內地趕劇。問到是否有意跟男友於「六條一」擺酒結婚？她說：「唔係，我哋搵場搞Party啫！嗰日我生日，其實我以前都想喺嗰日結婚，不過我依家喺內地拍一集電視劇有成6位數字，而且我同男友都有共識，暫時會以事業為重。」