JC挑戰娜姐：佢做到我都做到

外間以為Jessica C.（JC）與周秀娜一起拍戲必定很多是非，明爭暗鬥一定有，但JC強調兩人非但沒有不和，還不時互相鼓勵，雖未至於成為朋友，但肯定不是敵人。她從來不會跟人比較，只會遇強愈強！

啲人成日覺得我哋成班女仔一齊拍《熱浪球愛戰》，一定會有好多是非，特別係我同周秀娜（Chrissie），話我哋不和，其實我同佢之前已經喺一個活動上合作過一次，拍戲係我哋第二次合作。雖然曾經合作過，但之前我並唔認識佢，只係聽到傳媒話佢點樣點樣，又會拎我哋兩個嚟比較，我會明白到娛樂圈係咁，做娛樂工作就會有呢啲新聞。我唔係一個一識人就唔鍾意人嘅女仔，我會首先欣賞一個人嘅優點，從好嗰方面去睇嗰個人。

記得第一次喺片場見到Chrissie，我都有少少遲疑，心入面會諗，唔知佢係一個點樣嘅女仔。到開始拍戲時，我發覺佢係一個好勤力嘅女仔，好隨和，對人好友善，佢仲幫咗我好多，會教我講廣東話。當我同Chrissie冇傾偈時，啲人就會覺得我哋唔鍾意對方，其實工作時，大家都想畀空間對方，我哋冇嘢嘅！

我同Chrissie成日一齊為部電影做宣傳工作，同佢合作好開心，拍戲時佢又會教我點樣講對白，仲會鼓勵我。我試過NG咗好多次，覺得好沮喪，Chrissie會走埋嚟同我講：「It's OK，唔使擔心，有我哋喺度，加油呀！部電影上映時，唔會有人知道你NG咗幾多次o架！」

多得拍檔扶持

拍戲時遇到咩困難，我哋都會互相支持。Chrissie係個好聰明嘅女仔，喺電影圈嘅發展都好好，我唔會刻意同佢比較，但係我會同自己講，我都要努力，佢做到嘅，我都可以做到。同人比較即係唔接納自己，要對自己有信心同埋學識欣賞自己。我好幸運，第一次拍戲就遇到好嘅演員、導演，仲有其他工作人員個個都好好人，拍攝過程好開心！

（明日待續）

口述：Jessica C.

筆錄：名人組