千嬅企硬拒減歌酬

由新秀出道至今已十多個年頭的楊千嬅，終於一償心願，舉行一個滄海遺珠式的演唱會，將紅館的舞台濃縮移師九展，雖然座位有限，但有感通貨膨脹，歌酬也堅持企硬。

千嬅在紅館開騷多次，每次都唱盡金曲，但她一直有個遺憾，不少滄海遺珠的作品都無法分享，等了十多年才找到一個合適時機，如願舉行比較冷門的演唱會：「今次係唱Sidetrack嘅歌，大熱主打嘅《少女的祈禱》、《小城大事》和《可惜我是水瓶座》呢啲肯定唔會唱，我哋講清楚畀大家知，費事觀眾入錯場。」

本來她想在灣仔演藝學院舉行，但因檔期及製作不容許，最終拍板在九展舉行，她更是首個在九展搭建四面台的歌手，雖然場地較紅館細，但製作費絕對不會慳皮，她說：「呢樣我好堅持，你賣飛畀人唔可以平，我都過唔到自己。」至於歌酬方面可有優惠價？千嬅笑言歌酬當然要企硬：「你都係要唱咁多隻，唔通細力啲唱呀？3分鐘嘅歌唱一半咩？依家通貨膨脹，菜心都貴咗四蚊斤啦！」

生仔隨緣

完成心願後，千嬅希望明年可以休息，問到是否跟老公丁子高專心造人？她否認停工是為生仔：「呢兩年我冇停過，真係好攰想休息吓！」其實千嬅從來沒有想過停工生BB，她直指各行各業的女性都是前四後六，將來如果有喜，她不認為要特別停工。至於經常被追問生仔可覺得大壓力？她輕鬆地說：「我個人又唔係好聽人講，都係忠於自己生活節奏，有就有囉！冇就冇囉！」