陳嘉桓晒壁虎功驚「摺埋」

打女陳嘉桓於新片中飾演一名啞女，挑戰演技，有功夫底子的她還有不少動作戲，一場壁虎功撐牆戲，令她畢生難忘！

陳嘉桓在新片《競雄女俠－秋瑾》中飾演啞女，她表示過往的演出可透過語言來配合，但今次只能靠身體語言及眼神演戲：「真係有啲難度，對我嚟講係一個考驗，但作為新人，有一個咁好嘅機會去學習，要好好珍惜同把握，做到最好。」她笑言曾因不小心出聲而吃NG，並說：「因為唔可以出聲，唔可以用說話叫佢重複講多次，所以拍攝時要更專心。用眼神做戲好重要，對日後演出好有幫助。」

讚黃奕好戲

談到動作戲，陳嘉桓其中一場需要用壁虎功在兩道牆中間支撐着，她說：「雖然有威吔吊住，但都好驚，一直撐住唔敢放鬆。武師叫我唔使怕，因為有威吔吊住，但我驚一放鬆就會凌空摺埋，所以我最長一次試過幾個鐘撐喺兩道牆之間，連午飯都唔食，怕會嘔番出嚟。」

另外，今次與內地演員黃奕再度合作，陳嘉桓大讚對方專業：「其中一場戲佢要喊住離開我哋，睇住佢一邊喊一邊演出相當自如，我都睇到好感動。」