莊思敏Phone騷示威廖碧兒眼冤冇影

廖碧兒狠撇陳豪後，一心轉軚欲生擒林忠豪，殊不知殺出單身的莊思敏！為宣示主權，莊思敏自爆林忠豪送她iPhone 4S潮物定情，難怪「輸家」廖碧兒對莊思敏退避三舍，昨晚刻意甩底避免與情敵同場！

自與陳豪甩拖後，廖碧兒旋即被傳搭上林忠豪，可惜突然殺出一個剛剛與吳浩康分手的莊思敏！日前莊思敏在微博上載一張iPhone 4S照，竟有弦外之音，原來這部潮物正是林忠豪送的冧女信物！

晒命話「做多咗」

莊思敏昨日出席舞台劇活動時，被問到林忠豪有甚麼冧招時，即滔滔不絕，一字一句顯出志在必得，她說：「冧招？好難講喎！唔太刻意啦！大家識咁耐！（林忠豪有咩實質冧招？）佢都幾細心，不過都唔係乜絕招，只係幾日前送過部iPhone 4S囉！」並風騷揚言林忠豪送禮「做多咗」，未知會否令廖碧兒酸溜溜？

可憐廖碧兒已把筍盤陳豪拱手相讓給陳茵媺，如今又被程咬金莊思敏殺出，牌面上輸凸的她原本昨晚應邀出席Harvey Nichols活動，未知是否深怕跟「情敵」莊思敏同場，臨時甩底玩「冇影行動」！透過經理人表示因要到廣州工作而未能赴會的她，卻有時間出席晚上另一個時裝活動，未知是否刻意迴避莊思敏？但其經理人解釋：「今日（昨日）佢係去廣州做電視節目，但佢5點幾先返，所以去唔到囉！唔係避莊思敏，當時我哋都冇落實話出席，不過9點個時裝活動就去到！」

林生變咗代言人

沒有廖碧兒在場，穿上Deep V長裙的莊思敏零舍風騷，問到若與廖碧兒同場會否尷尬？她說：「係咩？撞到朋友個朋點會尷尬？」她又表示一直與林忠豪有聯絡，還拋下對方是其代言人的金句：「有食飯呀！一般朋友聯絡囉！佢打畀我問我點解之前同人講同佢冇聯絡，因為之前有記者問我又問佢，我同佢講番係有聯絡，林生真係好似變咗我代言人咁！」出席嘉賓還包括任達華夫婦、周柏豪、Alice B.、Ana R.、諸葛紫岐、李玟家姐李思林、林莉及傅嘉莉等。