Eason借怪味論剃無綫眼眉

本報日前披露四大與無綫破冰在望，身為四大歌手的陳奕迅（Eason）卻在敏感時刻首度高調亮相亞視，還激讚亞視空氣清新來暗寸無綫，明剃眼眉！

無綫與四大唱片公司破冰在即，連無綫外事部副總監曾醒明亦透露雙方有突破性進展，由文件往來到最近坐低傾，但絕迹無綫兩年的Eason依然冇面畀照寸寸貢！他昨日首度踏足亞視大埔總台，為《亞洲星光大道4》擔任嘉賓，入行十多年的他笑言以往只有踩單車才路經亞視，雖第一次作客心情緊張，特別選皮鞋配鑽飾盛裝出席，但到場後跳跳紮充滿好奇心。

「呢度乾淨啲」

提到踏入亞視的感覺，Eason即滔滔不絕，讚亞視如「天上有、地下冇」，更藉機暗寸無綫！他說：「好奇幻！呢度冇咁多人，空氣都清新啲，將軍澳嗰邊（無綫電視城位於將軍澳）無論係搬前定搬後，空氣都係咁，有陣『特別』味道，呢度乾淨同開揚啲！」問到曾與亞視合作拍特輯，但收視未如理想，他說：「我唔介意收視，有嘢做就OK！（播咗冇人知？）我咁大口，點會冇人知呀？」對於在破冰敏感時刻亮相亞視，Eason直言不知情：「我真係唔知喎！（期望重返無綫？）不嬲主張多啲平台。（自由出入電視台？）唔得！始終要經過警衞，慢慢熟習吓。」雖然心情緊張，但他卻遲到45分鐘，他笑說：「雖然陳奕迅未試過準時，但我都要再檢討吓，要人等又真係唔好意思！」

亞視高級副總裁葉家寶透露為配合Eason新歌MV今晚播出，特別「剪開」播映中的劇集時段來播放MV，他得悉後亦開心講多謝。他早前為國語新歌《看穿》拍MV時施展舞技，雖然跳舞細胞活躍，但他在五小時的拍攝下也感疲憊，更險些手抽筋。

除了對Eason重視有加外，葉家寶指趁明年55周年台慶，於1月1日在北京人民大會堂舉行大型演唱會，雖撞正樂壇頒獎禮，但會積極聯絡各地歌手，年中亦會於北京舉行另一場演唱會，更有意舉行樂壇頒獎禮及為星光家族成員出唱片。