官恩娜愛到盡莊思敏戀咁Feel

莊思敏和官恩娜是同一類人，儘管所愛是個計時炸彈，只要有Feel，哪怕炸到粉身碎骨，依然轟烈去愛，這是她們的愛情「盡化論」！行年三張，等仔溝倒不如主動出擊！

入行七年的官恩娜（Ella），歷盡高低起跌，縱是歌手出身，惟早年歌手身份模糊，直至前年擔任《超級巨聲》PK賽嘉賓，憑《Endless Love》一曲成名，歌藝備受肯定！她自言是幸運之神眷顧，感激公司栽培：「我好幸運！我同公司捱過一關又一關，大家都冇放棄。」自從04年的《地平線》成為兩個電台冠軍歌後，Ella等足七年憑《由他去》再嘗冠軍滋味，勇奪三個電台冠軍：「同事話我知嗰陣，我唔係好信，後來知咗，真係感動到眼濕濕！」近日Ella有份演出的電視劇正在播映，稍後又與關楚耀舉行音樂會，工作不斷：「入行初時唔識珍惜，好似首歌有好成績，唔知點解要開香檳，依家睇番先知，有時得到嘅未必係必然，努力先係答案。」

除了事業再創高峰外，Ella與醫生男友的感情亦相當穩定，雖然未到談婚論嫁階段，但十分甜蜜！她自言屬工作狂：「冇諗結婚呢樣嘢。（閃婚？）我係有咁嘅潛質，但應該唔會。（結婚公開？）都會！」她自認是敢作敢為的女生：「如果我想做一樣嘢，會盡力做到最好，唔鍾意被勒住，好似最近我學騎馬，試過受傷，但鬥心更大，挑戰性更強！（敢愛敢恨？）都係！要盡情去愛，享受戀愛過程。」

鍾意缺陷美

雖然已有要好的醫生男友，但Ella仍然與過氣緋聞男友吳卓羲扯上關係。對於男方與張馨予爆出戀情，又與徐子珊傳緋聞，Ella只說：「明白呢行嘅遊戲規則。（避忌唔多講？）唔想講唔關自己事嘅嘢，最想講同工作有關嘅嘢。」

人紅自然靚，惟Ella自潑冷水：「呢排唔夠瞓，皮膚差咗。（整容？）唔反對人哋整容，自己唔會整，我個樣雖然唔係完美，但我鍾意呢種唔完美嘅樣貌，因為呢個先至係我個樣，我唔係上鏡大美人，左邊面大過右邊面，加上三眼皮，但呢啲『缺陷』反而嚟得自然。」

後記：絕非野蠻女友

官恩娜雖然有穩定的醫生男友，但仍未接受到同居，更遑論談婚論嫁，個性爽直的她更絕非野蠻女友：「一定唔係，我唔會Check男友手機或短訊。」

莊思敏曾經做過十月芥菜，對着心動的人總是開不了口，期望他說一聲：「I Love You！」千帆過盡，行年三張的她跟吳浩康說再見，不再靜待愛的來臨，隨時主動出擊！她說：「我真係唔介意追男仔囉！現代女性好難攞到一條平衡線，佢哋工作好忙，唔知道點樣喺工作同拍拖之間去分配時間。我依家唔會再浪費時間去等一個答案，只要有Feel，我亦知道佢對我有感覺，就會同佢講！如果佢對我冇意思，就唔會咁Open囉！」

撇大話情人

從甜蜜到失敗，莊思敏歷練出屬於自己的愛情哲學：「拍拖愈耐，愈知道自己要一個點樣嘅人，Deep（吳浩康）令我成長好多，我好多謝佢一直以來對我嘅驕縱！但我知道依家經唔起一個大刺激，我要一個同我溝通到同值得信任嘅人，唔想再遇到一個講大話嘅人，試問有邊個人鍾意身邊另一半講大話呢？呢樣好重要！」對於兩性關係，莊思敏有另一套特別諗法：「對我嚟講，只要鍾意，男女唔係太大分別！如果結婚生仔，當然要揀男人啦！但如果只要開心，解決心靈滿足，其實女仔真係冇乜所謂！」

到底是向左走或是向右走，自與Deep分手後，爆出莊思敏跟廖碧兒緋聞男友林忠豪過從甚密，她曾說：「我覺得林忠豪好有事業心，自己向來喜歡有上進心嘅男人！」下一站是男還是女，似乎相當明顯，但莊思敏再修正說：「我同佢咁Friend，冇理由彈佢，但我讚佢，唔代表有任何意思。我可以講嘅係，如果佢差就唔會做到咁耐朋友啦！今日唔知聽日事，將來嘅事冇人會知！」

的確，誰能為情定分界，對於愛情，莊思敏想愛便愛，在她的字典裏，做人亦然：「現代女性應該獨立啲，錫自己多啲，自己要享受自己做緊嘅嘢！我唔會後悔隆胸，因為做之前已經深思熟慮，如果係影響身體，我一早就拆彈啦！依家身體適應咗呢個『天生一對』，我覺得冇問題！」如此敢言，這就是莊思敏！

後記：剷青不做公主

莊思敏曾想做一個清湯掛面的白雪公主，所以一頭長髮，一留便是二十多年。不過人是會變的，近日她剪短三千煩惱絲，還愈剷愈Punk，小記問她頭髮會再短嗎？她笑說：「我想再剷青啲囉！其實我都幾男仔頭o架！唔玩芭比公仔，玩變形金剛都唔錯！」

場地：Balalaika Russian Bar & Restaurant

髮型：Eve Chiu